Дәуірдің әр кезеңінде жұртты аузына қаратар оқиғалар үздіксіз орын алып тұрады. Сондай жағдайдың бірі 2008 жылы Жапонияда болып, Кеничи Ито есімді азамат 100 метр қашықтықты 18 секундта бағындырды. Таңқаларлық дүние емес деп ойлағанмен, оның өзгелерден басты айырмашылығы – жануарға ұқсап төрт аяқтап жүгіруі болды. Бастапқыда спорттық жаттығу түрі ретінде танылған бұл әрекет ғаламтор мен әлеуметтік желіде трендтік сипатқа ие болды. Әлемнің әр түкпірінде осы ағымды дәріптеушілер көбейді. Тренд әсіресе жастар арасында танымал болды.

Бүгінде атышулы тренд Қазақстанға да жетті. Алматы, Астана секілді ірі қала көшелерінде жастар түрлі жануардың бетпердесін тағып, төрт аяқтап жүруді әдетке айналдырған. Сырт көзге оғаш көрінгенімен, балаларының бұл әрекетіне оң көзбен қарап, қолдау білдіретін ата-аналар да бар. Олардың айтуынша, ХХІ ғасырда балалары өздеріне ұнаған іспен айналысқаны жөн. Ал квадробика олардың әлеуметтік желіден алшақтап, табиғатпен етене жақын болуына таптырмас хобби. Тіпті спорттық жаттығу ретінде де денсаулыққа пайдалы дейді.

Алайда таяқтың екі ұшы болатыны секілді бұл трендтің теріс тұстары байқалған соң оған қарсылық білдірушілер де табылған. Квадробиканың қауіпі туралы жарыса жазып, дабыл қағып жатқандар бұған тез арада тосқауыл қоюды талап етуде. Наразылардың айтуынша, жануарға ұқсап төрт тағандап жүру, олардың істегенін қайталау – бірінші кезекте физикалық тұрғыдан қауіпті. Буыны қатаймаған бүлдіршін мен жасөспірімдер трюктар жасау барысында әртүрлі дене жарақатын алу бек мүмкін. Сондай-ақ, хайуанға еліктеген жастардың психологиясы жабайы өмірге үйренісе келе агресивті мінез көрсетіп, адамға шабуыл жасауы да ықтимал.

Трендке айналған субмәдениетке қатысты Қазақстан мұсылмандары діни басқармасы да түсініктеме берген. Ресми өкілдің мәлімдемесіне сәйкес, адамның жануарға еліктеуі, ол секілді өмір сүруі, оның тіршілігіне бейімделуі шариғатқа қарсы.

Серікболсын СЕРПЕН,

М.Х.Дулати атындағы Тараз

университетінің 4-курс студенті