Сублимацияланған жемістер – алдымен терең мұздатылып, кейін құрғатылатын өнім. Соның арқасында жемістің табиғи дәмі, түсі, иісі және құрамындағы дәрумендері жоғалмай сақталады. Ерекше құрылымы мен қытырлақ дәмі жастарды өзіне тартып тұрады. Тараздық сатушы Айдана Қуанышқызы бұл өнімге деген қызығушылық әсіресе жастар тарапынан артқанын айтады.

– Соңғы кезде бұл жемістерге сұраныс жоғары. Әсіресе, жастар мен балалар көп алады. Себебі әлеуметтік желілерде кеңінен танылып үлгерді. Тәтті жегісі келетіндер енді шоколад емес, осы сублимацияланған жемістерді таңдайды. Жеңіл, серуенге де ыңғайлы. Көпшілігі балаларға кәмпиттің орнына алып беріп жүр. Бағасы да қолжетімді – 1000-2000 теңге шамасында, – дейді А.Қуанышқызы.

Тай ананасы да бүгінде трендке айналған өнім. Табиғи тәттілігімен ерекшеленетін бұл жеміс әсіресе денсаулығына мән беретін жандардың таңдауы болып отыр. С дәруменіне бай, ағзаның иммунитетін күшейтеді, артық салмақтан арылғысы келетіндер үшін пайдалы. Себебі калориясы төмен, бірақ тоқтық сезімін ұзақ сақтайды. Жүрекке де пайдалы – құрамындағы калий қан қысымын реттеп, жүрек жұмысын жақсартады. Тараздағы базарлар мен ірі супермаркеттерде бұл жеміс 2000-5000 теңге аралығында сатылуда.

Ал пишмание қосылған шоколад – тәттіні ерекше дәммен үйлестіргісі келетіндердің таңдауы. Салмасына түріктің тәттісі пишмане қосылатын бұл өнім желіде «Түкті шоколад» деген атаумен кең таралып, көптің көңілінен шығып үлгерді. Жеңіл құрылымы, ауызда еритін жібектей жұмсақтығы шоколадқа ерекше дәм береді. Тараздық студент Әлихан Серікұлы алғаш дәмін татқанда таңданысын жасыра алмағанын жеткізді.

– Әлеуметтік желіден көріп, қызығып жүр едім. Шынымен ерекше екен. Ауызға салған сәтте ериді, өте жеңіл. Жай ғана шоколад емес, мүлде бөлек дәм сезінесің. Бұл шоколад түрі қаламыздағы кондитерлік дүкендерде 1000-3000 теңге аралығында сатылып жатыр, – дейді Әлихан.

«Ерекше дәм мен сән қуып жүріп, денсаулыққа зиян келтіріп алмаймыз ба?» деген сұрақ туындайды. Осы орайда бізге диетолог Айгүл Сапарқызы пікір білдірді.

– Сублимацияланған жемістердің артықшылығы – олардың құрамында қант пен консервант қосылмайды. Табиғи күйінде қалады. Сондықтан пайдалы жеңіл тағам ретінде қарастыруға болады. Бірақ табиғи қант мөлшері жоғары болғандықтан, диабетпен ауыратындар немесе салмақ қадағалап жүргендер мөлшеріне мән бергені дұрыс. Тай ананасы да өте пайдалы. Иммунитетті көтереді, зат алмасуды жақсартады. Алайда кейбір адамдарға аллергия беруі мүмкін. Сол себепті алғаш рет жегенде байқап көру керек. Ал пишмание қосылған шоколадқа келсек, бұл өнім дәмді болғанымен, құрамында қант пен май мөлшері жоғары. Тәттіні мөлшермен жеген абзал. Артық салмақ немесе қант диабеті мәселесі бар адамдарға абай болған жөн, – дейді маман.

Тағам – енді тек қажеттілік емес, тренд пен сәннің бір бөлшегі. Әр заманның өз таңдауы бар. Бірақ сән қуамыз деп шектен шығып кетпей, ең бастысы – денсаулықты ұмытпайық. Шынайы дәм мен пайда қашан да қарапайымдылықта екенін естен шығармайық.

Ақжүніс НАҚЫПЖАНҚЫЗЫ,

М.Х. Дулати атындағы Тараз

университетінің 4-курс студенті