Қыр гүліндей құлпырған қатысушылар әуелете ән салып, мың бұрала билеп қана қоймай актерлік қырларымен де көрерменді тәнті етті. Сұлу да сымбатты сырғалыларымыз салт-дәстүрге байланысты сұрақтарға да жауап берді.

Байқаудың «Сәлем – сөздің анасы», «Сымбатына ақылы сай келсе…», «Білектей арқасында өрген бұрым», «Мәдениетім – мәртебем, өнерім – өрісім» сынды бір-бірімен астасқан әр кезеңі аруларға бойларындағы қарым-қабілеттерін барынша ашып көрсетуге мүмкіндік берді.

Байқаудың қорытындысында бас жүлдеге Ақтөбе ауылдық округінің аруы Кәусар Талапханқызы лайық деп танылды. Бірінші орынды төлебилік ару Әлия Құдайберген иеленді. Екінші орын Көктөбе ауылдық округінің аруы Диана Қазақбайға бұйырса, үздік үштікті Көкқайнар ауылының аруы Ажар Төлепбай еншіледі.

Ал, шулық Диана Қабылбекова «Тапқыр ару», Дулат ауылдық округінің аруы Қаршыға Абдрахман «Дарынды ару», Бірлікүстем ауылдық округінің аруы Мөлдір Дихан «Өнерлі ару» номинацияларына ие болды. Барлық аруларға жастар ресурстық орталығы тарапынан бағалы сыйлықтар табысталды.

Айғаным АСҚАРБЕК,

журналист,

Шу ауданы