Тағылымды іс-шарада облыстық Қазақстан халқы Ассамблеясы төрағасының қоғамдық орынбасары Асқарбек Сейілхан, Аналар кеңесінің төрағасы Эльмира Мырза-Ғали, Тараз қалалық өзбек этномәдени бірлестігінің төрағасы Абдурахман Зайнутдинов сөз алып, мәдени-тарихи ескерткіштерді, басқа да рухани құндылықтарды, қоғамдық орындардағы мүліктерді аяусыз, қасақана жоюға қарсы іс-шараларды қолдайтындықтарын жеткізіп, ел мен жерге деген жанашырлық «Адал азамат» тұлғасының ең асыл қасиеттерінің бірі екендігін атап өтті.

Сондай-ақ, облыс әкімдігі мәдениет және тілдерді дамыту басқармасына қарасты тарихи-мәдени ескерткіштерді қорғау және қалпына келтіру дирекциясының директоры Сауран Қалиев киелі өлкеміздегі 500-ге жуық тарихи-мәдени құнды жәдігердің басым бөлігінің тарих сахнасынан жойылып кетуге шақ қалғанын айтып, қоғамдық бастаманың сәтті жүзеге асуына тілектестік білдірді.

Іс-шара барысында «Оңтүстік» өңірлік қолбасшылығының әскери оркестрі патриоттық әндер шырқаса, «Анаға тағзым» отбасын қолдау орталығының қызметкері Балауса Оралбаева «Бағала» әнін нақышына келтіре орындады.

Сондай-ақ Тараз қаласындағы №66 орта мектептің оқушылары ақын-жазушылардың шығармаларынан үзінділер оқыды.

Жиын барысында шаһардан табылған жәдігерлер көрмесі ұйымдастырылды.

Айта кетейік, жоба жыл бойы өңіріміздегі барлық аудандарда жүзеге асырылады. Жоба аясында оқушыларға бай тарихи-мәдени мұраларымыз туралы ақпарат беріліп, қысқы, жазғы демалыс кезінде тарихи орындарға саяхат ұйымдастырылады.

Сондай-ақ, «Жұмысшы мамандықтары жылына» орай, тарихи ескерткіштер жасаушы скульпторлар шеберханасына, гипс зауытына, металл, әйнек зауыттарына жастармен экскурсиялар жасап, вандализмге көбірек ұшырайтын заттардың жасалу жолы көрсетіледі.

Одан өзге, жоғары сынып оқушылары мен колледж студенттеріне «Атыңды жер өртеп шығарма!», «Қолда бардың қадірін біл!» тақырыптарында эссе жаздыру, барлық мектептерде жергілікті құқық қорғау органдарымен бірлесіп түсіндірме жұмыстарын жүргізу жоспарлануда.

«AR-AI»-ақпарат