Адамдардың теміржол аймағында жарақат алуының алдын алу бойынша тиісті жұмыстар атқарылып жатқанымен оқыс оқиғалар азаймай тұр. Тіпті кейбір жағдайда ауыр жарақат салдарынан адамдар өмірмен қош айтысып жатады. Осы орайда қауіпсіздік талаптарын түсіндіру, теміржол аймағында жиі орын алатын жазатайым оқиғалардың алдын алу мақсатында «ҚТЖ – Жүк тасымалы» жауапкершілігі шектеулі серіктестігі бірқатар іс-шара жүргізді. Атап өтетін болсақ, теміржол маңында тұратын тұрғындарға қауіпсіздік ережелері түсіндірілді. Сондай-ақ теміржол маңында орналасқан оқу орындарының оқушыларына «Теміржол – қауіптілігі жоғары аймақ» тақырыбында түсіндіру жұмыстары жүргізілді. Бұқаралық ақпарат құралдарында бөгде тұлғалардың қауіптілігі жоғары аймаққа шығуының алдын алу бойынша материалдар жарияланды. Желілік ішкі істер бөлімдерінің, әскерилендірілген теміржол күзеті және теміржол қызметкерлерінің қатысуымен бірлескен рейдтер жүргізіліп, тәртіп бұзушыларға ережелер түсіндірілді, жадынамалар таратылды. Теміржол өткелдеріндегі ескерту белгілері жаңартылды.

Жазатайым оқиғаларды тергеу нәтижесінде бөгде адамдардың теміржол аумағында жарақат алуының бірден-бір себебі алкогольді ішімдік тұтыну, вагондардың астынан өту, жүріп келе жатқан пойыздың алдынан жүгіріп шығу екені анықталды. Атап айтсақ,  Тараз стансасында 2024 жылдың тамыз айында және 2025 жылдың ақпан айында болған жазатайым оқиға кезінде 2 адам жарақат алған. Сараптама нәтижесі бойынша жарақат алған 2 тұрғынның да алкогольді ішімдік ішкені белгілі болған.

«Теміржол – қауіптілігі жоғары аймақ» деп тегін айтылмаған. Теміржол арқылы белгіленбеген жерлерден, жүріп келе жатқан пойыздың алдынан жүгіріп өтуге болмайды. Пойыздың бірден тоқтамайтынын естен шығармау керек.

Теміржолдан өту үшін арнайы өтпе көпірлерін, жүргіншілерге арналған төсеніштер және өткелдерді пайдаланыңыздар, көрсеткіштерге назар салыңыздар, берілген дыбыстық сигналдарды тыңдаңыздар.

Вагондардың үстіне шығып, баспалдақтар, өтпе алаңшалары және вагондардың тамбурларына мініп жүруге үзілді-кесілді тыйым салынады. Вагондардың астынан өтуге, пойыз қозғалыста болған кезде мінуге және түсуге болмайды.

Теміржолда электр тогынан зардап шегу қаупі де жоғары. Вагондардың үстіне міну, түйіспе желісінің үзілген сымдарына 10 метрден артық қашықтыққа және олардан салбырап тұрған сымдарға жақындау адам өміріне қауіпті.

Дархан ЕСЕНҒАЛИ,
«ҚТЖ - Жүк тасымалы»
ЖШС филиалы – «ЖТ Жамбыл бөлімшесі»
Тараз стансасының бастығы