«Сәтті мансапқа жол» жобасы аясында өткен кездесуге студенттермен бірге облыстық және аудандық прокуратура мен әділет департаментінің қызметкерлері, аудан әкімі мен ауылдық округ мамандары, жергілікті басылым өкілдері қатысты.

Облыс прокуроры алдымен оқу орнының техникалық базасымен танысып, студенттер мен оқу шеберлерінің құзырына берілген жаңа заманғы  ауылшаруашылық техникаларының арсеналын көрді. Айту ләзім, болашақ жұмысшы мамандығына ие болатын білімгерлер су жаңа «Джон-Дир» астық комбайнымен, отандық және шетелдік төрт доңғалақты трактормен, қосалқы құрал-саймандардың көмегімен науқандық жұмыстарға қатысып, өздеріне өндірістік-практикалық тәжірибе жинақтай алатындықтарын іс жүзінде көрсетіп берді. Олар өздерінің 7 мамандық бойынша білім алатынын, дәлірек айтқанда, келешекте слесарь-жөндеуші, механизатор, электромонтер, есептеу техникасы және ақпараттық желілер, бағдарламалық қамтамасыз ету, электргазбен дәнекерлеуші, токарь болып шығатынын мақтанышпен айтты. Сонымен қатар колледж студенттерінің жеке газеті бар екенін жеткізіп, механизация бөліміндегі жастардың өздері қолдан жасаған мини тракторын, жылыжай макеті мен көліктің жүріс бөлігінің стендін, аспаз қыздардың әзірлеген дайын өнімдерін алға тарттты.

Мұнан соң  Нұрғали Мәжитұлы оқу орнының мәжіліс залында кездеу өткізіп, бұл басқосудың ең негізгі мақсатының бірі жастар арасында жұмыссыздықты болдырмау, ол үшін Мемлекет басшысы Қасым-Жомарт Тоқаевтың биылғы жылды «Жұмысшы мамандықтар жылы» деп жариялауының маңызы ерекше екенін тілге тиек етті.

– Облысымыздың колледждерінде 28 мың студент білім алады. Олар күні ертең жұмысшы мамандықтарын алып шығады. Егер оқу орындары кәсіпорын, мекемелермен келісімшартқа тұрып, жас мамандарды осы бастан жұмысқа орналастыру жағын ойластырмаса, онда олар жұмыссыз жастар қатарына қосылады. Сөйтіп, тәртіп бұзады. Жақында осындай бір студент біреудің ұялы телефонын ұрлап ұсталды. Әрине, ол жазасын алды. Менің айтайын дегенім де осы. Егер сіздер оқу бітірушілерге жұмыс тауып бере алмасаңыздар, олар осындай әрекетке барады. Иә, жұмысшы болу – мәртебелі мамандық.  Сондықтан жастар арасындағы түсіндіру жұмыстарын босаңсытпауымыз керек, – деді Нұрғалым Мәжитұлы.

Келесі кезекте сөз алған облыстық әділет департаментінің басшысы Нұрғали Андасов осынау «Сәтті мансапқа жол» жобасының тиімді тұстарын  айта келіп, құқықтық тәртіптің сақталуына баса назар аударды. Ал колледж директоры Ғалымжан Қырықбайұлының айтуынша, оқу орнын бітіргендердің 78 пайызы жұмысқа орналастырылыпты.  Колледж әкімшілігі 75 кәсіпорынмен келісімшартқа тұрған екен. Меркі ауданының әкімі Ербол Жиенқұлов  өз сөзінде аймаққа әлі де механизатор, дәнекерлеуші, жөндеуші мамандықтары ауадай қажет екенін жеткізді.  

Кездесуді облыс прокуроры Нұрғалым Әбдіровтың өзі қорытындылады. Ол өз сөзінде осындай кездесулердің Тараз қаласында және Шу ауданында  өткенін, мұндай тағылымы мол басқосулардың жұмысшы жастарға тигізер тәрбиелік маңызы зор екенін баса айтты.

Осы кездесудің нәтижесінде «Меркі» шипажайының өкілі Марат Қасым мен «Меркі тәжірибе» шаруашылығының басшысы Қобыланды Манкеев №9 колледж директоры Ғалымжан Қырықбайұлымен бірге «Қоғаммен байланыс» аясында екіжақты меморандумға қол қойды. Бұрынғы жеміс-жидек кеңшарының жұмысын одан әрі қарай жаңғыртуды қолға алған Қ.Манкеев  әзірге 8 мың, алдағы күзде 65 мың түп алма мен алмұрт көшетін өсіріп, Ауыл шаруашылығы министрлігінің көмегімен жаңа техникалар алатынын, сондықтан фермерлер мен дәнекерлеуші мамандықтарын меңгерген мамандарға мекеменің өте зәру екенін жасырмады. Меморандумға қол қойған кәсіпорын басшылары келешекте колледж түлектерін қажеттіліктеріне қарай жұмысқа орналастыруға міндеттеме алды.

Сейсен ҚОЖЕКЕ,
журналист
Меркі ауданы.