Әдеби кеште жинақтың тұсаукесері мен ақынның өлеңінен заманауи үлгідегі көрініс көрсетіліп, поэзиялық компазиция көрермен назарына ұсынылды.

Сонымен қатар басқосуға арнайы келген зиялы қауым өкілдері сөз сөйлеп, ақынға деген ыстық ықыластарын білдірді.

– Есет Жаңабайұлы ізгі қасиеттерімен дараланып, айналасына үлгі болып жүрген жандардың бірі. Бір ұжымда еңбек ете жүріп, еңбекқорлығына, сарқылмас күш-жігеріне таңданбау мүмкін емес. Себебі бір күннің өзінде бірнеше іс-шараға қатысып, маңызы зор мақалалар жазып, әлеуметтік желілерде қоғамға ой саларлық жазбалар қалдырып отырады. Бұл Есет ағамыздың бойындағы ерен еңбектің, табандылық пен алғырлықтың көрінісі. Есет ағамызға қажырлы еңбегінің зейнетін көруді тілейміз, – деді «AULIEATA-MEDIA» жауапкершілігі шектеулі серіктестігінің Бас директоры Данияр Асқарұлы.

Ал арнайы құттықтап келген ақын Баймаханбет Ахмет Есет Досалымен бірге қызмет еткен жылдарға сапар шегіп, езуге күлкі үйірерлік естеліктерімен бөлісті.

Іс-шара барысында облыстық айтыскер ақындар, жыршы-термешілер орталығының үйірме оқушылары ақынның өлеңдерін жатқа оқыды.

Келесі кезекте жасырын қонақтар ортаға шығып, ақын жайлы өз пікірлерін білдіріп, ақжарма тілектерін арнады. Сонымен қатар Есет Досалы мен шәкірті Дидар Апбасов керемет айтыс өрнегін көрсетті.

Әдеби кеш барысында ақын кітабының тұсауы кесіліп, «Сәт» триосының әншілері әсем әннен шашу шашты.

Мұқағали БАЛТАБАЕВ