«Nomad» қазақша «көшпенді» деген мағынаны білдіреді. Көшпенді бабаларымыздың рухын бойына сіңірген топ мүшелері өздерін жаңа заманның рухани жауынгерлері деп санайды. Олар үшін өнер – тек сахнадағы қойылым немесе ән орындау ғана емес, тұтас бір идеология.

Бұл өнер ұжымының басын қосқан Рахат Айшауов есімді ұлттық өнерге шын берілген, жас орындаушыларға қолдау көрсетуді мақсат еткен азамат, продюсер.

Топ құрамындағы өнерпаздардың екеуі, яғни Мағжан Сержанов пен Жарқын Мұратбеков Кенен Әзірбаев атындағы облыстық филармонияның кәсіби музыканттары болса, қалған үш жігіт Байғали Мырзақұл, Медеу Ердалиев, Ықылас Көпейсінов Асқар Тоқпанов атындағы облыстық қазақ драма театрының актерлары.

Топтың құрылуы ойламаған жерден басталыпты. Әрқайсысы өнерге ғашық, бірақ жеке шығармашылық жолымен жүрген азаматтар бір күні ортақ шешімге келеді. Олар тек дәстүрлі өнерді дәріптеп қана қоймай, оны қазіргі заманғы музыкамен, сахна өнерімен үйлестіріп, жаңа бағытта дамыту керектігін түсінеді. Осылайша, «Nomad» – өнерге деген шынайы махаббаттың арқасында дүниеге келген жобаға айналған.

– Біз ата-бабамыздан жеткен өнерді жаңғыртып қана қоймай, оны бүгінгі жастардың түсінігіне сай жеткізуді қалаймыз. Ұлттық болмысымыздан алыстап бара жатқан замандастарымызға қазақ өнерінің, мәдениетінің әлі де өзекті екенін көрсеткіміз келеді, – дейді топ мүшесі Мағжан Сержанов.

«Nomad» тобының басты ерекшелігі – олардың сахналық стилі мен орындау мәнерінде. Топтың сахналық киімдері ерекше назар аударуға тұрарлық. Барлық киімдер ұлттық нақышта тігіледі, бірақ заманауи сән үлгісімен үйлестіріледі. Киім үлгілерін дайындауға топ мүшелерінің өздері қатысады. Жарқын есімді жігіт эскиздер сызып, топ мүшелерімен ақылдаса отырып әрбір костюмді ерекше етіп жасауға атсалысады. Бұл киімдер жай ғана сәндік элемент емес, Ұлы Дала мәдениетінің бір бөлшегі, көшпенділер рухын бейнелейтін көркем дүние.

Музыкалық орындау мәнерінде де өзгешелік бар. «Nomad» тобының мүшелері ұмытыла бастаған ұлттық аспаптарымызды да кеңінен насихаттап жүр десек болады. Әсіресе, көпшілікке таңсық даңғара, асатаяқ, шертер сияқты дәстүрлі аспаптар қолданылады. Бұл аспаптар тек музыкалық құрал ғана емес, қазақтың бай мәдениетінің белгісі ретінде сахнада көрініс табады.

«Nomad» тобы алдағы уақытта ұлттық өнерді жаңа қырынан танытатын тың жобаларды жүзеге асыруды жоспарлап отыр. Олардың басты мақсаты – дәстүрлі өнерді жаңғырту ғана емес, оны қазіргі заманғы музыкалық бағыттармен үйлестіре отырып, кеңінен насихаттау.

– Біз этноөнерді бағалайтын, қолдайтын жандардың көп екенін білеміз. Алайда этноүлгідегі киімдерді тігетін шеберлер мен ұлттық аспаптарды жасайтын ұсталар аз. Бар болған күннің өзінде олардың қызмеі өте қымбат. Осы мәселені де көтеріп, ұлттық өнерге қолдау көрсетудің жолдарын қарастыру керек, – дейді топ мүшесі Жарқын Мұратбеков.

Өнерге адалдық пен ұлттық болмысқа деген сүйіспеншілік – «Nomad» тобының басты ұстанымы. Олар үшін қазақ мәдениеті – рухани қазына. Сондықтан өнер арқылы ұрпақ сабақтастығын жалғап, көшпенді мәдениеттің құндылығын сақтауды мақсат етеді.

Батырлар жырын жаттап, Бауыржан Момышұлы секілді қайсар рухты тұлғалардан үлгі алған жігіттер тек сахнада ғана емес, өмірде де ұлттық құндылықтарды ұстануды парыз санайды.

– «Nomad» – жай ғана өнер ұжымы емес, көшпенділер рухын жаңғыртуға бағытталған қозғалыс. Біз тек ән айтып, сахнада өнер көрсетіп қоймаймыз. Біз – ұлттық рухтың сақшысы ретінд, өз дәстүрімізді дәріптеп, жастарға оның құндылығын түсіндіруді мақсат етеміз, – дейді олар.

Көпшілік заманауи бағытқа бет бұрып, шетелдік музыканы тыңдауға бейім болғанымен, ұлттық өнерді сүйетін, қолдайтын жастар аз емес. Топ мүшелері дәл осы тыңдармандар үшін жұмыс істейді, қазақ өнерін қадірлейтін әр жанашырға өз өнерін ұсынуды басты парыз санайды.

Топ тек сахнада өнер көрсетумен шектелмейді. Олар ұлттық өнерді дәріптейтін шеберлік сабақтары мен танымдық кездесулер ұйымдастыруға ниетті. Өнерге қызығатын жас буынға өз тәжірибелерімен бөлісіп, дәстүрлі музыка мен театр өнерінің қыр-сырын түсіндіруді де мақсат етуде. Сонымен қатар, олар қазақтың бай мұрасын жаңа форматта жеткізу үшін кино және театр жобаларына қатысуға дайын.

Жігіттердің тағы бір арманы – Қазақстанның түкпір-түкпірін аралап, ауыл-аймақтардағы тыңдармандарымен кездесу. Ұлы Даланың рухын сезініп, нағыз қазақтың өнерін сахнада көрсету – олардың басты миссиясы. Қазіргі таңда топ бірнеше өңірден шақырту алып, гастрольдік сапарларға дайындалуда.

«Nomad» тобы алдағы уақытта қазақ өнерін шетелге де танытуды көздейді. Олар ұлттық музыканы әлем сахнасында насихаттап, қазақтың көшпенді мәдениетінің әлі де өзекті екенін дәлелдегісі келеді. Бұл мақсатта халықаралық фестивальдерге қатысып, ұлттық аспаптар мен дәстүрлі әндерді жаһандық аудиторияға ұсыну жоспарда бар.

Қазақ өнерін сүйетін жандар үшін «Nomad» тобы – көшпенділер рухының бүгінгі бейнесі. Ұлттық мәдениетті дәріптеуге үлес қосу – олардың өмірлік мақсаты.

Ұлы Дала мәдениетін заманауи сахнада қайта жаңғыртып жүрген «Nomad» тобы болашақта өз тыңдармандарын әлі талай жаңашыл жобалармен қуантатыны анық.

Айжан ӨЗБЕКОВА