Толарсақтан саз кешкенді ұнатқан,
Баспана іздеп, баз кешкенді жұбатқан. 
Талапты ұлдан үмітті ме бұл қала,
– Кетпе, дейді. – Қалшы қалқам, тұрақтан.

Жігіт едім тәуекелге бас ұрған,
Үсік қолын жең ішінде жасырған. 
Қаратаудан көш түзеген Бетпаққа,
Армандарын Алатаудан асырған.

Сары аязы салғандай-ақ сынаққа, 
Салқын көңіл сезілмеді бірақ та. 
Бір білгенім – адалдық пен адамдық,
Ерді еңбек жеткізеді мұратқа.

Қайырлы ұлдан қай қазақ та дәмәлі,
Сақтай келіп Әулиеатаның әдебін. 
Сарысуым, сағынышпен қабыл ал,
Астанадан асқақ ұлдың сәлемін!  

                                                                                                                                                                                            Нұрсұлтан Рахымбай