Жалпы орталық екі бағытта жұмыс істейді. Біріншісі – облыстың цифрландыру жобаларын іске асыру мен үйлестіру, екіншісі – мемлекеттік секторға жобалық басқаруды енгізу және дамыту.

Баяндамашының сөзінше, аймақта «Ауылдық денсаулық сақтауды жаңғырту», «Қолжетімді интернет», «Келешек мектептері» секілді ауқымды жобалар жүзеге асырылуда. Мәселен, Шу және Талас аудандарында көпсалалы орталық ауруханаларға күрделі жөндеу, қосымша нысандар салу жұмыстары жүргізіліп жатыр екен. Ал «Қолжетімді интернет» жобасы аясында Меркі, Жуалы, Т.Рысқұлов, Қордай және Мойынқұм аудандарында антенналық діңгектер орнатылуда.

Бір айта кетерлігі, өңірдегі жобалардың орындалуы «Bitrix» платформасына енгізілген. Өткен жылы 393 жоба басталса, оның 253-і сәтті аяқталып, 140-ы осы жылға өтпелі деп танылған. Гүлпара Алашбайқызының айтуынша, республика бойынша облысымыз мемлекеттік қызметте жобалық басқару қағидаларын қолдану рейтингінде алғашқы орындарға тұрақты түрде ие болып отыр.

– Облысымыздың жобалық басқару офисіндегі мамандардың 100 пайызы жобалық басқару бойынша арнайы оқудан өтіп, сертификат алған. Бұл бізге SWOT және GAP талдауларын жүргізіп, жобалардың әлсіз тұстары мен тәуекелдерін алдын ала анықтауға, жұмыс сапасын арттыруға мүмкіндік береді. Ұлттық жобалық офис жүргізетін рейтингте өңіріміздің тұрақты түрде алғашқы орынды иеленуі – осы жүйелі еңбектің нәтижесі, – деді ол.

Бүгінде облыстың мемлекеттік қызметшілері арасында 257 маман біліктілігін арттырып, заманауи басқару стандарттарын меңгерген. Алдағы уақытта бірыңғай ақпараттық жүйеге жасанды интеллект элементтерін қосу жоспарлануда.

Н.МҰСАТИЛЛАҰЛЫ