Бөлімнің негізгі қызметі – аса қауіпті жұқпалы аурулардың алдын алу, диагностикалау, вакцинациялау, малдан алынатын тамақ өнімдері мен шикізаттардың адам өміріне қауіпсіздігін қамтамасыз ету.

Спикердің сөзінше, осы жылы жануарлардың аса қауіпті ауруларына қарсы ветеринариялық-профилактикалық іс-шаралар жоспарға сәйкес тиісті деңгейде орындалуда.

– Сарып ауруын анықтау мақсатында 2026 жылдың 3 айында ауылшаруашылық жануарларынан 108 мыңнан астам қан сынамасы алынып, диагностикалық тексеру жұмыстары жүргізілді. Нәтижесінде 4 ұсақ малдан сарып ауруы анықталып, олар «Рамазан» жеке кәсіпкерлігінің мал сою пунктіне өткізілді. Зертхана қорытындысымен, ережеге сәйкес 15 күннен аспайтын мерзім ішінде оң нәтиже көрсеткен жануарлардың жағына немесе сауыр аймағына «Б» әрпі таңбаланып, уәкілетті органның қатысуымен құрылған комиссия арқылы оқшауланды. Одан әрі санитариялық союға жіберілді. Ауданда бірдейлендіру жұмыстары бойынша 67 430 бас ауылшаруашылық жануарының төлдері бірдейлендірілді. Ауылдық округтерде жалпы 111 ветеринар маман жұмыс атқарады. Оның ішінде 32-сі – жоғары білімді, 79-ы – орта білімді қызметкер, – деді Ғ.Бақбергенұлы.

Бөлім басшысының айтуынша, аудандағы 15 ауылдық округтің он екісінде ветеринариялық бекет бар. Олар екпе егу, емдеу орындарымен қамтылған. Солардың үшеуі әкімшілік ғимаратта орналасқан.

Ал мал өлекселерін тастайтын 3 биотермиялық «Беккари» шұңқыры Ақбұлақ, Құлан, Өрнек ауылдық округтеріне тиесілі. Осы жылы тағы бесеуін салу жоспарланған.

Сонымен бірге елді мекендерде 27 Сібір жарасы ошағының көмінділері орналасқан. Ол жерлер ветеринариялық талаптарға сәйкес қоршалған, бетондалған, тақтайшаларында аурудың тіркелген жылы мен айы жазылған. Тұрақты түрде тоқсан сайын дезинфекциялау жұмыстары жүргізіліп отырады.

Нұрбақыт ТҰТҚЫШБЕКОВ