Осыған орай біз күнделікті тұрмыста жиі қолдануға болатын қарапайым әрі тиімді кеңестерді топтастырып ұсынып отырмыз. Бұл тәсілдер үй шаруасын жеңілдетіп, уақыт пен күшті үнемдеуге көмектеседі деген ойдамыз.

КИІМГЕ ЖАБЫСҚАН САҒЫЗДЫ ҚАЛАЙ ТАЗАЛАУҒА БОЛАДЫ?

Киімге сағыз жабысып қалса, оны бірден алып тастау оңай емес екенін бәріміз білеміз. Алайда бірнеше қарапайым тәсіл арқылы бұл мәселені жылдам шешуге болады екен.

Ең тиімді әдістердің бірі – сағыз жабысқан киімді полиэтилен пакетке салып, тоңазытқыштың мұздатқыш бөлігіне шамамен бір сағатқа қою. Суық температураның әсерінен сағыз қатып, қатты күйге айналады. Осыдан кейін оны саусақпен немесе пышақтың ұшымен ақырын алып тастауға болады. Көп жағдайда сағыз өзі үгітіліп түсіп қалады.

Тағы бір тәсіл – сағыз жабысқан жерге мұз басу. Мұз сағызды тез қатайтады. Сағыз толық қатқан кезде қатты щеткамен немесе киім щеткасымен тазалауға болады. Бұл әдіс әсіресе кілем, төсеніш, пальто немесе қалың маталы киімдер үшін өте қолайлы.

МИКРОТОЛҚЫНДЫ ПЕШТІҢ ІШІНДЕГІ МАЙ ДАҚТАРЫН ОҢАЙ КЕТІРЕ АЛАСЫЗ

Асүйдегі ең жиі қолданылатын тұрмыстық техникалардың бірі – микротолқынды пеш. Уақыт өте келе оның ішкі қабырғаларында майлы дақтар жиналып, жағымсыз иіс пайда болуы мүмкін. Мұндай жағдайда қымбат тазартқыш құралдарды қолданбай-ақ қарапайым тәсіл арқылы пешті оңай тазалауға болады.

Алдымен микротолқынды пешке жарайтын ыдыс алып, оның ішіне жартылай су құйыңыз. Содан кейін жарты лимонды бірнеше тілімге бөліп, сол суға салыңыз. Ыдысты пештің ішіне қойып, шамамен 3-5 минут қыздыру керек. Қыздыру барысында лимон қосылған су буға айналып, пештің ішіндегі майлы дақтарды жұмсартады.

Уақыт өткен соң пешті өшіріп, ыдысты абайлап шығарыңыз. Суды төгіп, лимон тілімдерін алып тастауға болады. Ал пештің ішін жай ғана ылғал шүберекпен сүртіп шықсаңыз жеткілікті. Осылайша майлы дақтар оңай кетіп, пеш қайтадан таза күйіне келеді.

ПИЯЗ ТУРАҒАНДА КӨЗДІ АШЫТПАУДЫҢ ТӘСІЛІ КӨП

Көптеген адамдар пияз турағанда көзден жас шығатынын жақсы біледі. Бұл пияздың құрамындағы заттардың ауаға таралуынан болады. Дегенмен, оны болдырмаудың бірнеше қарапайым әдісі бар.

Мысалы, пияз турап жатқанда жалбыз қосылған сағыз шайнауға болады. Сағыз шайнау тыныс алу процесін өзгертеді және пияздың әсерін азайтады.

Тағы бір тиімді әдіс – пиязды турамас бұрын оны 5 минуттай мұздатқышқа салып қою. Суық температура пияз құрамындағы ұшпа заттардың бөлінуін баяулатады. Сондықтан мұздатқыштан шыққан пиязды турағанда көз ашымай, жұмыс әлдеқайда жеңіл болады.

ЖҰМЫРТҚАНЫ ҚАЛАЙ ҰЗАҚ САҚТАУҒА БОЛАДЫ?

Тоңазытқышта жұмыртқаның ұзақ уақыт бұзылмай сақталуы үшін қарапайым әдіс қолдануға болады. Жұмыртқаларды тоңазытқышқа салмас бұрын олардың қабығын өсімдік майымен жұқалап майлап қою керек.

Май жұмыртқаның қабығындағы ұсақ тесіктерді жауып, ауа кірмеуіне көмектеседі. Соның арқасында жұмыртқалар әдеттегіден үш-төрт аптаға дейін ұзақ сақталуы мүмкін.

ТУРАЛҒАН АВОКАДО ҚАРАЙЫП КЕТПЕСІН ДЕСЕҢІЗ...

Авокадоны турағаннан кейін оның беті тез қарайып кететіні белгілі. Мұны болдырмаудың бір жолы – туралған авокадоны ыдысқа салып, жанына бір тілім пияз қою. Пияздың бөлетін заттары авокадоның түсін сақтауға көмектеседі.

Тағы бір тәсіл – авокадоның бетіне аздап алма сірке суын себу. Бұл да жемістің қарайып кетуін баяулатады.

Осындай қарапайым тұрмыстық кеңестер күнделікті өмірде көп көмегін тигізеді. Көп жағдайда күрделі мәселелердің шешімі қарапайым әрі қолжетімді тәсілдерде жатады. Сондықтан мұндай лайфхактарды біліп жүрген артық болмайды.

Сымбат ҚУАНЫШ