Өтініш беруге 18-24 жас аралығындағы ер азаматтар қатыса алады. Қабылдау 10 маусымға дейін жалғасады.

eGov.kz порталында өтініш берушілер жеке деректерін көрсетіп, оқу орнын таңдайды, жүйе мәліметтерді автоматты түрде тексереді (медициналық комиссия, соттылық, білім туралы ақпарат). Қабылдау нәтижесі жеке кабинетте көрсетіліп, расталған электрондық құжат немесе негізделген бас тарту хабарламасы беріледі.

Әскери оқу орындарында бакалавриат бағдарламалары тегін және жұмысқа орналастыру кепілдігімен жүзеге асады. Оқу аяқталған соң институт түлектеріне «лейтенант», колледж түлектеріне «сержант» әскери атағы беріледі.

Қазіргі формат бұрынғыдай жергілікті әскери басқару органдарына баруды қажет етпей, рәсімдерді толық автоматтандырды. Қазақстанда үш әскери институт және бес әскери колледж жұмыс істейді.