Үлкен одақтың өңірдегі филиал төрағасы, облыстық «Ғұмыр-Дария» газетінің бас редакторы Жаңабай Миллионов одақ құрамына мүшелікке қабылданған 6 тілшіге куәлік пен арнайы төсбелгіні және естелік сый-сияпатты табыстады. Сондай-ақ, ардагер журналист ізінен ілбіген жас тілшілерге бағыт-бағдар беріп, аталық акыл-кеңесін айтты. 

– Біз бүгін ұлт мүддесі жолында қаламын қару еткен, журналистика саласының қазанында қайнауға ниетті бірқатар жасты үлкен одақтың мүшелігіне қабылдағалы отырмыз. Бұл – сала маманы үшін үлкен абырой, биік мәртебе. Тілшілік тіршілік жанқиярлық еңбекті, ұдайы ізденісті тіпті, соның жолында таңды таңға соғуды талап етеді. Журналист үшін әрбір оқырманның, тыңдарманның ыстық ықыласынан артық үлкен марапат жоқ, – деді Жаңабай Миллионов. 

Қызығы сол, республика бойынша одақтың 6000-шы мүшесі болып «Taraz24» телеарнасы директорының орынбасары Әйгерім Отарбаева қабылданды. Сондай-ақ, одақ құрамының тізімінен табылғандар қатарында жергілікті телеарна тілшілері: Сапаржамал Оразбекова, Қанат Күзберген, Нұрдәулет Мұса, Назерке Тазабаева  және Кирилл Бердецкий да бар.

Ұлттық баспасөз күнімен тұспа-тұс келген шараға қатысқан ардагер журналист Қуаныш Иембердиев, «Aulieata-media» серіктестігінің Бас директоры Данияр Асқарұлы, «Jambyl» телеарнасының директоры Гүлбаршын Құланбаева және «Taraz24» телеарнасының директоры Зарина Қуаттегі сөз алып, еңбегі еленген жас журналистерді құттықтап, толайым шығармашылық табыс тіледі.

Айта кетейік, Қазақстан журналистер одағы 1959 жылы 12 – 14 қарашада өткен Қазақстан журналистерінің 1-съезінде құрылды.