Бұл бастама өскелең ұрпаққа әскери-патриоттық тәрбие беру, құқықтық сауаттылықты арттыру және болашақ кәсіби бағдар беруге бағытталған. Полиция сыныбы оқушылардың ішкі істер органдары қызметімен жақынырақ танысуына, азаматтық жауапкершілікті бойларына сіңіруіне ықпал етеді.

Облыстық полиция департаментінің жеке құраммен жұмыс жөніндегі басқарма басшысының міндетін атқарушы, полиция подполковнигі Ғалымжан Оразбековтің айтуынша, бұған дейін облыс бойынша 20-дан аса «Жас сақшы» полиция сыныбы ашылып, бүгінде нәтижелі жұмыс атқарып келеді.

– Бұл сыныптың ашылу негізі Ішкі істер министрлігінің №680 бұйрығына сәйкес жүзеге асырылуда. «Жас сақшы» сыныбының оқушылары білім алу, өздерінің құқықтық мәдениеттерін қалыптастыру, құқықтық тәртібін нығайтып, мектепте заң мен тәртіп орнату, кіші қылмыстардың алдын алу шаралары аясында тәрбиеленіп шығады. Сабақ уақыты аптаның әр бейсенбі күніне жоспарланған. Сабақ барысы теориялық және практикалық бағытта өтіп отырады. Практикалық сабақтар департамент қызметкерлерінің белсенділігі аясында ұйымдастырылады. Оқушылар түрлі шараларға қатысып, кинологтармен де тығыз байланыс орнатып, олардан тәжірибе жинайды. Сабақ барысында үздік атанып, өзін жақсы қырынан танытқан оқушылар Ішкі істер министрлігінің жоғары оқу орындарына грантқа түсу конкурсына қатыса алады. Жеңімпаздар сол конкурс аясында анықталады,– дейді Ғалымжан Русланұлы.

Әрі қарай «Жас сақшы» полиция сыныбының ашылуына белсене атсалысқан қызметкерлер марапатталды. Сондай-ақ Тараз қаласы әкімдігі білім бөлімінің бас маманы Қайрат Үкібасов пен мектеп директоры Айнұр Егетайқызы құттықтау сөз сөйлеп, игі бастаманың жүзеге асуына атсалысқан ұйымдастырушыларға ризашылықтарын білдірді. Сонымен қатар олар жас сақшыларға білім мен тәртіпті қатар ұстанып, елге адал қызмет ететін азамат болып қалыптасуларына тілектестік білдірді.

Мерекелік жиын оқушылардың «Батыр бабам Бауыржан» әнін орындауымен, күмбірлеген күймен көркем әрленіп, соңында қатысушылар естелік суретке түсіп, тарқасты.

Мұқағали БАЛТАБАЕВ