Кондитерлік сала да дәл осындай талаптарды қажет ететін мамандықтардың бірі. Мұнда тек өнімдердің үйлесемі ғана емес, сондай-ақ аспаздың шеберлігі мен шығармашылығы да жарасым табады.

Тәттіні жақсы көрмейтін жан жоқ. Әсіресе, әдемі безендірілген тәттілер көздің жауын алып, тәбетті ашады. Десе де, оны пісірудің өзі үлкен еңбек пен төзімділікті талап етеді. Осындай еңбектің шын құнын біліп, оны өз кәсібіне айналдырған жандардың бірі – Нәзира Бақытжан.

Тараз қаласының тұрғыны Нәзира 12 жылдан бері кондитерлік салада салада жемісті еңбек етіп, жарқын жетістіктерге жетіп жүр.

– Алғашында шағын дәмханаларда жұмыс істеп жүрдім, уақыт өте келе неге өз-өзіме жұмыс істемеске деген ой келді. Сол ойдың жетегінде жүріп әрі үйдегі кішкентай балаларымды қалдыратын жер болмағандықтан, жұмыс дәмханадан шығып кеттім. Басында әрине қорқыныш болды. «Тапсырыс берушілер бола ма екен?! Кәсібім жүрмей қалмас па екен?!» деп көп уайымдадым. Бірақ уақыт өте келе тұтынушылар көбейе бастады. Көпбалалы ана болғандықтан алғашында тапсырыстарды үйде отырып пісіріп, дүкендерге өткізіп жүрдім. Уақыт өте келе ұлдарым ержетіп, қыздарым бойжеткен соң кәсібімді белсенді түрде жүргізуді жөн көрдім. Ең басында жалғыз өзім үлгермей жатқан соң тұңғыш қызым Жұлдыз көмектесе бастады. Қазір кішігірім отбасылық кәсібіміз бар. Жұмыс уақытымыз күндізгі тоғыздан, кешкі жетіге дейін созылады. Кейде тұтынушыларымыздың өтінішімен той-томалақ, құдалықтарға тапсырыс аламыз, – дейді Нәзира.

Жұмыстың оңайы жоқ. Қай мамандықты алып қарасақ та, оның өзіне тән ерекшелігі мен қиындығы бар. Ал бұл салада да дәм үйлесімі мен өнім сапасы бірінші орында. Сондықтан Нәзира Бақытжан әрбір тұтынушының талғамына сай өнім ұсынуды басты қағидасына айналдырған. Оған қоса, шебер аспаз тек тамақ пісіріп қана қоймай, авторлық десерттері арқылы тәтті әлемді жаңа қырынан ашып, күнделікті желідегі мәзірін жаңартып отырады.

Осы орайда бала күнінен анасының оң жағына шығып қолғабыс болып жүрген қызы Жұлдыз Бақытжанды да әңгімеге тарттық.

– Әлеуметтік желі арқылы түрлі тәттілерге, кейде ыстық тамақтарға, салаттарға тапсырыс түседі. Бізде күнде балғын өнім болады. Сондықтан да тұтынушыларымыздың қатары көп. Көп тәттілеріміз, тағамдарымыз өзіміздің авторлық туындыларымыз. Әр тұтынушының талғамына қарай жұмыс істейміз, біреуіне салмасы көп тәттілер ұнаса, екіншісі керісінше ащы тамақтар қалайды. Сол қалаулардың бәрін ескеруге тырысамыз. Тұтынушылардың талғамына талас жоқ, сол себепті күнделікті дайындайтын тағамдарымызды мейлінше дәмді әрі ерекше дайындауға тырысамыз. Мәзірдегі тағамдардың бағаларына келетін болсақ, әртүрлі. Күнделікті келушілер тұрақты тапсырыс берушілеріміз болғандықтан баға да қалта көтерімді. Таңсәріден басталған жұмысымыз, қас қарая бір-ақ бітеді. Күн сайын жұмыс уақыты басталмас бұрын дәмхананың ішін тазалап, залалсыздандырып шығамыз, жұмыс уақытының соңында да осы жұмыс қайталанады. Кейде күніге тағам әзірлеуден шаршайтын уақыттарымыз болады, бірақ тынымсыз еңбек етіп жүрген анама, үйдегі бауырларыма қарап арқамды кеңге салып отыра алмаймын. Кей кездері басымдағы түрлі ойлардан арылып, шаршағанымды басу үшін тәттілер пісіріп демаламын. Аспаз болу үшін ең алдымен бұл жұмысты шын жүректен жақсы көру керек. Өз ісіңді қатты жақсы көрген сайын дамуға, жаңа идеяларды жүзеге асыруға деген талпыныс артады. Бір кездері үйдегі кішкентай кәсіптен басталған ісіміз бүгінде өз жемісін беруде. Анам екеуміздің дәмханамыз кішігірім болғанымен, біраз шыңдарды бағындырдық. Қиын кезеңдерді еңсердік. Алдағы уақытта кәсібімізді үлкейтіп, бірнеше дәмхана желісі мен кофеханалар ашу жоспарымызда бар, – дейді Жұлдыз Бақытжан.

Аспаздық кәсіптің қиындығы көп, бірақ соған қарамастан Нәзира Бақытжан табандылық пен шығармашылықты қатар серік етіп келеді. Нәзира мен Жұлдыз дайындаған өнімдер талай жүрекке жол тауып, талай қуанышты сәттің себепкеріне айналды.

Сымбат ҚУАНЫШ