Іс-шара аясында аймақтағы бұқаралық ақпарат құралдарының өкілдері мен пошта қызметінің мамандары бас қосып, жазылым процесін жетілдіру, басылымдардың уақытылы жеткізілуі және жазылушылармен тиімді жұмыс жүргізу бағытындағы мәселелерді талқылады.

«Қазпошта» АҚ «Самұрық-Қазына» Ұлттық әл-ауқат қорының құрамына кіретін, заманауи материалдық-техникалық базасы бар кәсіпорын. Қазіргі таңда компания 100-ден астам қызмет түрін көрсетеді.

Бүгінгі күні облыс бойынша логистикалық маршруттар 6 күнге дейін жиілетіліп, аудан орталықтарындағы жазылушыларға басылымдар күн сайын жеткізіліп отыр. Бұл іске 11 орталық операциялық телім, 18 қалалық, 146 ауылдық пошта бөлімшесі, 4 жылжымалы пошта байланыс бөлімшесі мен 8 пошта байланыс пункті, сондай-ақ 388 пошта тасушы курьер жұмылдырылған.

Жалпы мерзімді басылымдардың, оның ішінде жергілікті газет-журналдардың таралымы тұрақты сақталып отыр. Алдағы уақытта бұл көрсеткіштердің арта түсеріне сенім мол.

Іс-шара барысында бірқатар басылым өкілі пошта қызметінің қазіргі тарифі жазылушылар үшін қолайсыз екенін атап өтті. Атап айтқанда, ҚР Журналистер одағы Жамбыл облыстық филиалының төрағасы, облыстық «Ғұмыр-Дария» газетінің директор – бас редакторы Жаңабай Миллионов, облыс әкімдігінің ақпарат және қоғамдық даму басқармасы ақпараттық саясат және БАҚ мониторингі бөлімінің басшысы Бекнұр Сатыбалдиев, «AULIEATA-MEDIA» жауапкершілігі шектеулі серіктестігі Бас директорының орынбасары Азамат Есалы, осы серіктестікке қарасты «Знамя труда» газетінің бас редакторы Людмила Мельник, «AR-AI» жастар газетінің бас редакторы Тұрсынбек Сұлтанбеков, республикалық «Салық тәртібі» газетінің бас редакторы Ғалым Қасабай, сондай-ақ «Jambyl-Taraz» газетінің бас бухгалтері Индира Тайлыбаева де аталған мәселені көтерді.

Өз кезегінде «Қазпошта» акционерлік қоғамы облыстық филиалының директоры Дархан Асылханов бұл түйткілдер орталық аппарат деңгейінде көтерілетінін атап өтті.

А.ӨЗБЕКОВА