Биылғы 31 шілдедегі деректерге сәйкес, облыс халқының саны 1 220 041 адамды құраған. Оның ішінде 537 489-ы қала, 682 552-сі ауыл тұрғындары екен. Ал сала бойынша мемлекеттік секторда 37 заңды ұйым халыққа қызмет көрсетеді. 

Бүгінде отбасының цифрлық картасының және «Бекітілген халық тіркелімі» ақпараттық жүйесінің деректері бойынша сақтандырылған тұлғалар саны 943 670 болса, сақтандырылмаған тұлғалар саны 230 121-ді құрапты.

Сержан Сәрсенбекұлы қазіргі таңда, міндетті медициналық сақтандыру жүйесі есебінен базалық мемлекеттік медициналық көмектің көрсетілетін қызметтер пакетінің орнын толтырып, бюджеттің мүмкіндіктері мен міндеттемелері тұрғысынан теңдестірілген бірыңғай пакетін қалыптастыру бойынша біршама жұмыстар атқарылып жатқанын айтты.

– Медициналық көмектің бірыңғай пакеті неғұрлым кең таралған аурулар бойынша көрсетілетін қызметтердің базалық медициналық көмегін кепілді қамтамасыз етеді. Сондай-ақ тегін медициналық көмектің кепілдік берілген көлемі және міндетті әлеуметтік медициналық сақтандыру пакеті арасындағы қайталануды болдырмауға бағытталған. Бір пакеттік қаржыландыру пациенттер үшін де, дәрігерлер үшін де медициналық қызметтер тізбесінің ашықтығын қамтамасыз етіп, медициналық көмектің қолжетімділігі мен сапасын арттырады. Тегін медициналық көмектің кепілдендірілген көлеміндегі (ТМККК) медициналық-санитариялық алғашқы көмектің базалық пакеті сақтандыру мәртебесіне қарамастан науқас медициналық ұйымға жүгінген кезде медициналық көмек ала алады.

Осы орайда, облыс бойынша сақтандырылмаған тұлғалар санын азайту мақсатында, облыс аумағындағы қалалық емханалар мен аудандық ауруханалардың медициналық қызметкерлері және міндетті әлеуметтік медициналық сақтандыру қоры қызметкерлерімен құралған  жұмысшы топтың шығуы жүзеге асуда. Олардың негізгі мақсаты – медициналық сақтандыру мәселелерін шешу бойынша халықты толыққанды ақпараттандыру.

Бұдан басқа, азаматтарға медициналық қызметтерді қолжетімді және сапалы түрде ұсынуды қамтамасыз ету және бюджеттік мүмкіндіктер мен міндеттемелерді ескере отырып, жергілікті бюджет есебінен азаматтардың әлеуметтік осал санаттарының МӘМС жүйесіне қатысуын қамтамасыз ету жоспарланған.

Базалық мемлекеттік медициналық көмек көрсететін қызметтер пакетінің орнын толтырып, тиімді әрі теңдестірілген бірыңғай медициналық қызметтер пакетін қалыптастыру мақсатында уақытша қиындықтарға тап болған, табыссыз қалған азаматтар үшін жеңілдікті кезеңді ұлғайту нормасы енгізілді. Енді бес жыл ішінде өз бетінше және үзіліссіз жарна төлейтін азаматтар уақытша төлемдер болмаған жағдайда да алты ай бойы сақтандырылған мәртебесін сақтай алады. Бұрын бұл мерзім үш ай болатын. Сақтандырылмаған тұлғалар санын азайту мақсатында облыс аумағында орналасқан емханалар тарапынан тұрғындар арасында сақтандыру мәселелерін шешу бойынша ақпараттық-түсіндіру жұмыстары жалғасатын болады.

Дегенмен, тұрғындар тарапынан әр адамға өз денсаулығын сақтауға және нығайтуға шаралар қолдануға міндетті екенін еске салып, толыққанды медициналық көмек алу үшін, сақтандыру мәселелерін қолға алуға шақырамыз – деді С.Назарбек.

Орта медицина қызметкерлерінің санаттылығы бүгінде 32 пайызға жетіпті. Ал Байзақ, Жамбыл, Жуалы, Қордай, Меркі және Шу аудандарында орта медицина қызметкерлерімен қамтамасыз ету деңгейі әлі де төмен көрсеткішке ие болып тұр. Былтыр облыстағы өмір сүрудің ұзақтығы 75,53 жасты құрады, бұл республикалық орташа деңгейден жоғары. Оның ішінде ерлерде 71,62 жас, әйелдерде 79,55 жас. Әлеуметтік маңызы бар аурулардың ішінде туберкулез және қант диабетінің төмендегені мәлім болды.

Құралай СЕЙСЕНБЕКҚЫЗЫ