Ішкі істер министрлігінің нұсқауына сай, 27-29 шілде аралығында облыс аумағында «Түнгі қаладағы балалар» атты жедел алдын алу іс-шарасы өткен болатын. Брифингке қатысқан облыстық полиция департаменті жергілікті полиция қызметі басқармасы ювеналдық полиция тобының инспекторы, полиция майоры Азат Пірматов пен ювеналдық полиция тобының аға инспекторы, полиция майоры Оксана Семёнова 3 күнге жалғасқан іс-шараның қорытындысымен таныстырды.

– «Түнгі қаладағы балалар» жедел алдын алу іс-шарасының мақсаты – жасөспірімдер арасындағы қылмыстың алдын алу, кәмелетке толмағандардың құқықтарын қорғау саласындағы әкімшілік құқықбұзушылықтарды анықтау, олардың құқықтық сауаттылығын арттыру, сондай-ақ балаларға қатысты қылмыстық қол сұғушылықтардың алдын алу. 3 күндік іс-шара барысында ішкі істер органдарына 281 кәмелетке толмаған жасөспірім жеткізілді. Өмірлік қиын жағдайға тап болған балаларды қолдау орталығына 7 жеткіншек орналастырылды. Әртүрлі себептермен 21 кәмелетке толмаған және балаларды тәрбиелеу жөніндегі міндеттерді орындамайтын 7 ата-ана есепке қойылды. Полиция қызметкерлерімен есепте тұрған 195 кәмелетке толмаған жасөспірімнің тұрғылықты жеріне тексеру жүргізілді. «Мүлдем төзбеушілік» бойынша 317 әкімшілік құқықбұзушылық анықталды. Іс-шараны жүргізу және нәтижесі туралы бұқаралық ақпарат құралдарында барлығы 113 материал жарияланды, – деген Азат Жаңабекұлы жасөспірімдердің қатысуымен және оларға қатысты құқықбұзушылықтардың алдын алу бойынша профилактикалық жұмыстар облыстық полиция департаменті басшылығының тұрақты бақылауында тұрғанын жеткізді.

Құралай СЕЙСЕНБЕКҚЫЗЫ