2025 жылдың басында Бірлесу Еңбек ауылында Жамбыл ауданы прокуратурасының нұсқауымен құқық қорғау органдары жүргізген арнайы іс-шара нәтижесінде діни алауыздықты қоздыратын әдебиеттерді таратып келген төрт адамнан құралған топ анықталып, құрықталды.

Тергеу барысында аталған тұлғалардың әлеуметтік желілер арқылы Қазақстан аумағында заңмен тыйым салынған діни мазмұндағы үгіт-насихатты жүйелі түрде жүргізіп келгені дәлелденді. Тінту кезінде олардың үйлерінен экстремистік сипаттағы әдебиеттер тәркіленді.

Ағымдағы жылдың маусым айында Жамбыл аудандық соты бұл азаматтарды ҚР Қылмыстық кодексінің 174-бабы 1-бөлігі бойынша (діни алауыздықты қоздыру) кінәлі деп тауып, әрқайсысына 2 жыл мерзімге бас бостандығынан айыру жазасын тағайындады. Үкім заңды күшіне енді.

Прокуратура органдары радикалдық идеологияны таратуға жол берілмейтінін және мұндай әрекеттер үшін қылмыстық жауапкершілік көзделетінін ескертеді.