Тараз қаласындағы №25 түзеу мекемесінде былғары аяқ киім өндіретін жаңа өндірістік цех іске қосылды. Жоба облыстық прокуратура мен Қылмыстық атқару жүйесі департаментінің қолдауымен қолға алынып, сотталғандарды тұрақты жұмыспен қамтуға бағытталған.

Жеке кәсіпкер Бауыржан Теңізбаевтың бастамасымен ашылған өндіріс орны 90 миллион теңге инвестиция есебінен салынған. Жаңа цехтың жалпы аумағы — 500 шаршы метрден асады. Қазіргі таңда мұнда 25 жазасын өтеуші жұмыс істейді. Болашақта олардың саны 50-60 адамға дейін артпақ. Кәсіпорын тәулігіне 500-600 жұп аяқ киім шығаруға қауқарлы.

— Қазірдің өзінде цех толық қуатта жұмыс істеуге жақындап қалды. Жұмысшылардың жалақысы 85 мыңнан 200 мың теңгеге дейін. Олар тапқан табысын отбасына жіберіп, өмірін жақсарта алады, — дейді кәсіпкер Бауыржан Теңізбаев.

Түзеу мекемесіндегі еңбек – тек табыс көзі ғана емес, сонымен бірге әлеуметтік оңалту тетігі. Жұмыс істейтін жазасын өтеушілерге жазасын жеңілдету, қауіпсіздігі төмен мекемеге ауысу немесе мерзімінен бұрын босау мүмкіндіктері қарастырылған.

— Еңбек арқылы сотталғандар өздерінің материалдық шығындарын өтейді. Сонымен қатар, олар жаза мерзімінің үштен бірін өтегеннен кейін бостандығын шектеу жазасына ауыса алады немесе шартты түрде мерзімінен бұрын босауға өтініш бере алады, — дейді облыстық ҚАЖ департаментінің бастығы Жәнібек Қосжанов.

Бұл жоба сотталғандарды әлеуметтік ортаға қайта бейімдеудің және оларға екінші мүмкіндік берудің тиімді жолы. Жалпы Жамбыл облысындағы 5 түзеу мекемесінде бүгінде мыңға жуық адам жұмыспен қамтылған. Прокуратура мен ҚАЖ қызметі алдағы уақытта да мұндай әлеуметтік жобаларды жалғастыруды көздеп отыр.