Бұл туралы қордың баспасөз қызметі хабарлады.

Қордың мәліметінше, зейнет жасына жеткен 264 695 адам зейнетақы төлемдерін алу үшін әлі өтініш бермеген. Олардың жинақтары жеке зейнетақы шоттарында қалып отыр.

БЖЗҚ мәліметтеріне сәйкес:

148 335 адам қайтыс болған – олардың жинақтарын мұрагерлер талап ете алады;

59 800 адам шетелге тұрақты тұруға кеткен;

56 560 адам зейнетке шығуына қарамастан, Халыққа қызмет көрсету орталығына (ХҚКО) жүгінбеген.

Қор өкілдерінің айтуынша, сұраусыз жатқан зейнетақы жинағы инвестициялана береді және салымшының немесе оның мұрагерлерінің өтінішіне дейін зейнетақы шотында сақталады.

Зейнет жасына жеткен азаматтар БЖЗҚ-дан төлем алу үшін және мемлекеттік базалық/ынтымақты зейнетақыны рәсімдеу үшін тұрғылықты жеріндегі ХҚКО-ға жүгінуі керек.

Шетелге тұрақты кеткен, зейнетақы шоты бар азаматтар да заңда көрсетілген құжаттарды ұсыну арқылы өз жинағын алуға құқылы.

Қайтыс болған адамның туыстары:

94 айлық есептік көрсеткіш (АЕК) шегінде жерлеуге арналған біржолғы төлем ала алады (бірақ шоттағы қаражаттан аспауы керек);

Зейнетақы жинағын мұраға рәсімдеу үшін 6 ай ішінде нотариусқа жүгінуі қажет.

Уақыты өтіп кеткен жағдайда, мұрагерлік құқықты қалпына келтіру үшін сотқа шағымдану қажет.