ЖОЛ ЖӨНДЕЛІП, КӨШЕЛЕР ЖАҢҒЫРТЫЛУДА

Атап айтқанда, ауданда түрлі әлеуметтік нысандарды, елді мекен жолдары мен көшелерді, халыққа коммуналдық қызмет ұсынатын кәсіпорындарды жаңғырту, құрылғыларды жаңарту, су, жылу құбыры секілді ескірген жүйелерді жаңасына алмастыру, электр желілерін тарту, жұртты таза ауызсумен қамту мәселелері де кезең-кезеңімен шешілуде. Сонымен қатар көлік қатынасының қолжетімділігін арттыру мақсатында жол инфрақұрылымына айтарлықтай қаржы бөлініп жатқанын айта кетуіміз керек.

Аудан аумағында автомобиль жолдарының жалпы ұзындығы 774,8 шақырымды, ал елді мекен көшелерінің ұзындығы 212,8 шақырымды құрайды екен. Жалпы алғанда аудан бойынша жол желісі 987,6 шақырымды қамтиды. Оның ішінде республикалық маңызы бар жолдар 342 шақырым болса, облыстық маңызы бар жолдар – 271,6, аудандық маңызы бар жолдардың ұзындығы 161,2 шақырым болады. Ал елді мекендер ішінде 212,8 шақырым көшелер бар. Өткен жылы ауданның жол инфрақұрылымын жақсарту мақсатында 559,7 миллион теңге бөлініп, бұл қаржы бірнеше бағытқа жұмсалыпты. Оның ішінде жолдардың пайдалануға жарамдылығын сақтау үшін жүргізілетін ағымдағы жөндеу жұмыстары да бар. Оған жолдарды тазалау, шұңқырларды уақытша жөндеу, жол белгілерін орнату және жаңарту, жарықтандыру жүйесін күтіп ұстау сияқты жұмыстар кірген. Осындай жұмыстар үшін 263,2 миллион теңге жоғары тұрған трансферттер есебінен, автомобиль жолдарын жөндеу және қайта жаңартуға аудандық бюджеттен 412,6 миллион теңге қаралыпты.

Бөлінген қаражат есебінен елді мекен көшелерінің 22,06 шақырымына орташа жөндеу жұмыстары жүргізілген. Жалпы, жыл ішінде жеті жол жөндеу жобасын іске асыру жоспарланған. Оның ішінде «Қуатты өңірлер-ел дамуының драйвері» бағдарламасы аясында Көкжелек ауылына кіреберіс жолдың 2,7 шақырымын орташа жөндеуден өткізу қарастырылыпты. Бұл жобаға 70,1 миллион теңге бөлінген. Алайда іс аяғына дейін жетпеген. Аудан әкімдігі тұрғын үй-коммуналдық шаруашылық, жолаушылар көлігі және автомобиль жолдары бөлімінің басшысы Сәбит Донбаевтың айтуынша, жөндеу жұмыстарын «Даурен бюлд» жауапкершілігі шектеулі серіктестігі атқаруы тиіс болған. Бірақ бұл мердігер белгіленген мерзімде жұмысты бастамағандықтан, оларға екі мәрте ескерту хат жолданыпты. Қазіргі таңда сотқа талап арыз беріліп, сот процесі жүргізіліп жатқан көрінеді.

Көлік қатынасының жақсаруына «Приоритет 50-50» бағдарламасының да тигізіп отырған септігі мол. Аталған бағдарлама бойынша жол жөндеу жұмыстарының 50 пайызы мемлекеттік бюджеттен, қалған жартысы жергілікті бюджеттен бөлінетіні белгілі. Аудан көлемінде осы бағдарлама аясында жүзеге асырылып жатқан екі жоба арқылы жалпы ұзындығы 5,83 шақырым жолды орташа жөндеуден өткізуге 136,7 миллион теңге қарастырылыпты. Жоба аясында екі елді мекендегі көше жолдары жаңартылуда. Мәселен, Ұланбел ауылында 1,1 шақырым Бегенов көшесі, 1,2 шақырым Төлеби көшесі, 800 метр Қазақстан көшесі орта жөндеуден өткен. Жол жөндеу жұмыстарының жалпы сметалық құны 128,7 миллион теңгені құраған. Оның 65,4 миллион теңгесі аудандық бюджет есебінен жұмсалған. Мемлекеттік сатып алу порталы арқылы жарияланған ашық конкурс нәтижесінде «AYAN B HOLDING» жауапкершілігі шектеулі серіктестігі 118,8 миллион теңгеге мердігер ретінде анықталған. Межелі уақыт аралығында асфальт жамылғысы төселіп, жұмыстар толықтай аяқталыпты.

Ал екінші жоба бойынша жүргізіліп жатқан жұмыс жоғарыда сөз еткен Көкжелек ауылындағы төрт көшеге қатысты. Атап айтқанда, былтыр 1 шақырым Сырғабаев көшесі, Жабаев көшесінің 48 метрі, Смағұлов көшесінің 65 метрі, Әубәкіров көшесінің 6 метрі жөнделген. Бұл жұмыстардың сметалық құны 142,5 миллион теңгені құраған. Оның 71,3 миллион теңгесі аудандық бюджеттен қарастырылған. Аталған көшелерді жөндеу міндеті ашық конкурс нәтижесінде анықталған «Ал Кон Сер лтд» жауапкершілігі шектеулі серіктестігіне жүктелген. 131,5 миллион теңгеге жасалған келісімшартқа сәйкес асфальт жамылғысы былтырғы меже бойынша толық төселіп, жөндеу жұмыстары аяқталған. Бұл нысан 2025 жылға өтпелі жоба болғандықтан, қазіргі уақытта Көкжелек ауылындағы осы төрт көшенің қалған жөндеу жұмыстары үшін қосымша 71,2 миллион теңгеге облыстық басқармаға бюджеттік өтінім беріліпті.

Ауыл-аймақтарды дамыту – бүгінде өзекті мәселенің бірі. Осы мақсатта жүзеге асырылып жатқан «Ауыл – Ел бесігі» бағдарламасы ауыл тұрғындарының өмір сүру сапасын жақсартуға бағытталғанын айта кеткен жөн. Бағдарлама аясында елді мекендерде жолдар жөнделіп, мектептер мен ауруханалар жаңғыртылып, инженерлік инфрақұрылым жүйелері дамытылуда. Бағдарламаның басты артықшылығы – ауылдық жерлердің әлеуметтік нысандарын жаңарту арқылы халықтың тұрмыс жағдайын жақсарту. Ауылдық елді мекендерге сапалы жолдар тартылып, таза ауызсу мен тұрақты электр желісі қамтамасыз етілсе, тұрғындардың ауылдан көшіп кету көрсеткіші төмендейді. Сонымен қатар мектептер мен медициналық мекемелердің жөнделуі жастардың білім алып, денсаулық сақтау қызметтерін оңтайлы пайдалануына мүмкіндік береді.

Жалпы, «Ауыл – Ел бесігі» бағдарламасы тек жол жөндеу жұмыстарына ғана емес, ауылдық елді мекендерді кешенді дамытуға бағытталған. Ол елді мекендердің инфрақұрылымын жақсартып, ауыл өмірін жайлы ету арқылы тұрғындардың әлеуметтік әл-ауқатын арттыруға септігін тигізеді. Бұл тұрғыда, яғни «Ауыл-Ел бесігі» бағдарламасы бойынша былтыр Мойынқұмда ұзындығы 5,6 шақырым болатын екі жобаны жүзеге асыру қолға алыныпты. Құны 263,2 миллион теңгені құрайтын жоба аясында Мыңарал ауылындағы 3,7 шақырым Садықов, 1,6 шақырым Сейфуллин көшесіне орта жөндеу жұмысын жүргізу үшін 251,8 миллион теңге бөлінген. Мемлекеттік сатып алу порталына ашық конкурс жарияланып, тиісті құрылыс жұмысын жүргізуді мердігер «Ал Кон Сер лтд» өз міндетіне алған. 220,8 миллион теңгеге келісімшарт жасалып, бүгінде жұмыстар толық аяқталған.

Айдарлы ауылында 155 метр Итбасов, 132 метр Орынбаев көшесін орта жөндеуден өткізу үшін 11,4 миллион теңге қаралған. Бұл көшелерді  де жөндеуді «Ал Кон Сер лтд» ЖШС 11,4 миллион теңгеге мемлекеттік порталда жарияланған ашық конкурста жеңіп алған. Аталған көшелерге тиісті асфальт жамылғысы толық төселген.

– Мойынқұм ауданының автомобиль жолдарын жаңғырту және күтіп ұстау жұмыстары қарқынды жүргізілуде. Аудандық бюджет есебінен жалпы ұзындығы 10,63 шақырымды құрайтын екі жобаға 254,4 миллион теңге бөлінді. Атап айтқанда, Мойынқұм ауылындағы Омаров көшесіне ұзындығы 1,4 шақырымды құрайтын орташа жөндеу жұмыстары жүргізілді. Осы істі бастау үшін мердігер ретінде «Hunter» жауапкершілігі шектеулі серіктестігі анықталып, 76,8 миллион теңге қаржыға асфальт жамылғысы төселіп, жұмыстар толық аяқталды. Күшаман ауылында да жол жөндеу жұмыстары атқарылды. Өскенбаев көшесінің 2 шақырымы мен Тоқбаев көшесінің 1,4 шақырымы орташа жөндеуден өтті. Бұл жұмыстарға 101,9 миллион теңге қарастырылып, мемлекеттік сатып алу порталы арқылы мердігер ретінде «Ал Кон Сер лтд» жауапкершілігі шектеулі серіктестігі анықталған болатын. Тиісті келісімшарт жасалғаннан кейін 93,2 миллион теңгеге жөндеу жұмысы жүргізіліп, асфальт жамылғысы төселді. Сонымен қатар өткен жылдың бірінші тоқсанында 158,2 шақырым автомобиль жолдарын қардан тазалау және жолға инерттік материалдар себу жұмыстарына 6,2 миллион теңге жұмсалды. Аудандық маңызы бар жолдарды күтіп ұстау үшін 40 миллион теңге бөлініп, ашық конкурс нәтижесінде «Мойынқұм-СЕРВИС» жауапкершілігі шектеулі серіктестігі жеңімпаз атанды. Бұл компания Ақбақай-Мирный бағытындағы тас жолдың жамау жұмыстарын жүргізді. Жамбыл ауылындағы Б.Аманжолов көшесіне құм-шағалды төсеу жұмыстары үшін 29,5 миллион теңге қарастырылып, жеңімпаз мердігер ретінде танылған «ЖК Жанасыл» кәсіпкерлігі өз міндетін толық орындады. Осы жұмыстар да дер кезінде аяқталып, пайдалануға берілді. Мойынқұм ауданы үшін стратегиялық маңызы бар «Радай» өзені арқылы өтетін көпірдің құрылысы ақыры өз шешімін тапты. Бір жылдары осы өзен арнасынан асып, ондағы көпірді су шайып кеткендіктен бұл өткел аудан тұрғындары үшін өзекті мәселеге айналған еді. Соңғы төрт-бес жылда көпір құрылысын жүргізу бірнеше рет көтерілгенімен, оның оң шешім табуы түрлі себептермен кешеуілдеп келген болатын. Былтыр мойынқұмдықтар ұзақ жыл күткен көпір құрылысы басталып, түйткілдің түйіні тарқатылды. Аталған көпірді салу үшін 2024 жылы жалпы құны 626 миллион теңге болатын жоба әзірленген болатын. Оның ішінде 400 миллион теңге Ұлттық қордан, 100 миллион теңге республикалық бюджеттен, 55,5 миллион теңге облыстық бюджеттен қарастырылды. Құрылыс жұмыстары мемлекеттік сатып алу порталы арқылы ашық конкурс негізінде жүргізіліп, нәтижесінде Түркістан облысында көпір салумен айналысатын тәжірибелі «ЖБИ-С» жауапкершілігі шектеулі серіктестігі жеңімпаз атанған еді. Жалпы, «ЖБИ-С» компаниясы- еліміз бойынша көпір құрылысы саласында беделді кәсіпорындардың бірі. Олардың тәжірибесі мен технологиялық мүмкіндіктері көптеген ірі нысандарды сәтті аяқтауға мүмкіндік берген. Өткен жылы аталған серіктестікпен 573,9 миллион теңге сомасында келісімшарт жасалып, 2024 жылдың 18 наурызында құрылыс жұмыстары басталған болатын. Нысанның толық пайдалануға берілуі 2025 жылға тиесілі болса да аталған мердігер биылға жоспарланған жұмыстармен қоса көпір құрылысын былтыр толығымен аяқтады. Аудан тұрғындары үшін аса маңызды бұл көпір экономикалық және әлеуметтік қатынастардың жақсаруына оң ықпалын тигізуде, – дейді Сәбит Көбейұлы.

АУЫЗСУ МӘСЕЛЕСІ ШЕШІМІН ТАБУДА

Мойынқұм ауданындағы ауыз су мәселесі- жергілікті халықтың көптен бері көтеріп келе жатқан түйткілдерінің бірі. Кеңес дәуірінен бері пайдаланылып келген су жүйелері тозып, кейбір ауылдарда ауыз су тапшылығы байқалып, тұрғындар құдық суына тәуелді болып келді. Бұл әсіресе жаз айларында айқын сезілді. Мысалы, кейбір ауылдардың тұрғындары орталықтандырылған су жүйесінің не екенін әлі білмесе, кейбір ауылда ауызсу сағатпен берілуде. Соңғы жылдары осындай мәселені түбегейлі шешу үшін мемлекет тарапынан қомақты қаражат бөлініп, аудан аумағында жаңа су құбырлары тартылып, тозған инфрақұрылым кезең-кезеңімен жаңартылуда. Бұл тұрғыда мемлекеттік бағдарламалар аясында бірқатар елді мекендерде су жүйелері қайта жөнделіп, кей ауылдарға жаңа су ұңғымалары қазылуда.

Өткен жылы аудан бойынша бірнеше ауылда су жүйесін жаңарту, мембраналық қондырғы арқылы ауызсу тарату жұмыстары қолға алынып, кейбір елді мекен тұрғындары тиісті бағдарламаның рәтін көруде. Қазіргі таңда мойынқұмдықтар біртіндеп орталықтандырылған су жүйесіне қосылып, сапалы ауызсу тұтынуға мүмкіндік алған. Сонымен қатар жаңа су сорғы станциялары орнатылып, су беру тұрақтылығы жақсарған. Алдағы жылдары да осы мақсаттағы жұмыстар қолға алынып, ауылдарды таза ауыз сумен қамтамасыз ету бағытында жаңа жобалар жүзеге асырыла бермек. Мамандардың айтуынша, барлық қажетті инфрақұрылым жұмыстары кезең-кезеңімен жүзеге асса, бірнеше жыл ішінде аудан аумағында ауызсуға қатысты түйткілдер толық шешімін табады.

– Жалпы, таза ауызсу – халықтың денсаулығы мен тұрмыс сапасының басты кепілі. Сондықтан бұл бағыттағы жұмыстарды атқару күн тәртібінен түспейді. Мысалы, «Ақсүйек ауылын сумен жабдықтау және су тарату құрылысы» нысанына 2022-2023 жылдарға 1 461,3 миллион теңге бөлінген еді. Құрылыс жұмыстары 2023 жылдың соңына дейін толығымен аяқталғанымен, барлық құбырларды тексеру және іске қосу мүмкін болмағандықтан, мердігерге қабылдап алу жұмыстары жүргізілген соң берілетін 5 пайыз қаражат, яғни облыстық бюджет есебіндегі 63,696 миллион теңге 2024 жылға өтпелі ретінде қалдырылған болатын. Оған 38 шақырым ВЛ-35 кВ электр сымдарын тарту жұмыстарын жүргізу кезінде «KEGOG» акционерлік қоғамының «Алматы жүйеаралық электр тораптары» филиалынан электр желісін қиып өтуге келісім алу қажеттілігі туындаған. Дегенмен, бүгінгі күнге техникалық шарты алынып, «KEGOC» АҚ мамандары мәселені зерделеп, келісімі алынды. Алайда ауа райының қолайсыздығына байланысты 38 шақырым ВЛ-35 кВ электр сымдарын тарту жұмыстары кейінге  қалдырылды. Хантау ауылын сумен жабдықтау және су тарату құрылысы нысанына 2023 жылға 533,5 миллион теңге бөлінді. Құрылыс жұмыстары 2023 жылдын соңына дейін аяқталу қажет болатын. Бірақ екі мердігер қорытынды хаттамамен келіспеуіне байланысты сол жылы сот процесі жүрді. Сот процесі бұрнағы жылдың 15-қыркүйегінде  аяқталып, шешім қазан айында күшіне енді. Құрылыс жұмыстары 10-қазанда басталып, нысанды жыл соңына дейін аяқтау мүмкіндігі болмауына байланысты 100 миллион теңге 2024 жылға өтпелі ретінде қалдырылды. Қаражат 2024 жылы қайта пайдаланылып, жұмыстар жүргізілуде. Қабылдау жұмыстарын 2024 жылы жоспар бойынша желтоқсан айында аяқтау керек болған. Бірақ қазылатын аумқтардың  кейбірі тастақ жер болып шығуына байланысты техникалар қайта-қайта бұзылып, нысан құрылысын желтоқсан айының аяғына дейін аяқтау мүмкін болмады. Осыған байланысты нысан 2025 жылға өтпелі болып қалды.Балқаш көлінен мембраналық қондырғы арқылы ауызсумен қамтамасыз етіліп отырған Мыңарал, Шығанақ, Бурылбайтал стансасы, Мирный, Қияқты стансасы елді мекендері бар. Ондағы халықты сапалы әрі таза ауызсумен қамтамасыз ету үшін облыс әкімдігінің энергетика және тұрғын үй-коммуналдық шаруашылық басқармасына мембраналық қондырғы мен тазарту кешенін орнатуға және 1 жыл сервистік қызмет көрсетуге жалпы құны 311,9 миллион теңгеге 2023 жылы бюджеттік өтінім берілген болатын. Осылайша «Абырой Групп» және «DIER company» ЖШС-мен келісімшарт жасалды. Қазіргі таңда Мыңарал стансасы, Мыңарал ауылы, Мирный-Қияқты-Бурылбайтал стансасына мембраналық қондырғы орнату және оның 1 жылдық сервистік қызмет көрсету бойынша құрылыс жұмыстары аяқталып, қабылдап алынды. Шығанақ ауылы бойынша құрылыс жұмыстары аяқталған. Алайда нысанды тексеруден өткізу барысында Балқаш көлінен суды су қоймасына айдау сорғысының қуаттылығы төмен болған. Қазіргі таңда қуаттылығы жоғары сорғыны орнатып, айналдыра қосу (кольцевать) жұмыстары жүргізілді. Республикалық және облыстық бюджеттен Ақбақай ауылын сумен жабдықтау және су тарату құрылысы нысанына 1 533,5 миллион теңге қаржы қаралды. Мемлекеттік сатып алу порталына ашық конкурс жарияланды. Бұл бойынша «Интелект Азия» ЖШС мердігер болып анықталып, келісімшарт жасалды. 2 ұңғыма қазу, қоршау, ғимараттар салу жұмыстары аяқталды. Сондай-ақ 75 шақырым магистралды су құбырының бір шақырымынан басқасы бітіп тұр. Нысан құрыысы 2025 жылдың тамыз айында аяқталады деп күтілуде,– дейді С.Донбаев.

ЖОСПАРЛЫ ЖҰМЫС ЖАЛҒАСУДА

Осы жылы Мойынқұм ауданының жолының инфрақұрылымын дамытуға 448 миллион теңге қарастырылыпты. Бұл қаражат елді мекен көшелерін жөндеуге, аудандық маңызы бар жолдарды күтіп ұстауға және көпір құрылысына бағытталмақ. «Ауыл – Ел бесігі» жобасы аясында 45 миллион теңге бөлініп, Биназар ауылындағы Жайлаубек көшесіне орташа жөндеу жүргізіледі. «Өңірлерді дамыту» бағдарламасы бойынша Қарабөгет ауылына кіреберіс көпірдің құрылысына 181 миллион теңге қарастырылған. Бұл нысан ауыл тұрғындары үшін аса маңызды. Өйткені жылдар бойы көпірдің болмауы қатынасты қиындатып, көктем-күз айларында су тасқыны кезінде ауылға кіріп-шығу мәселесін күрделендіріп келіпті. Жергілікті бюджет есебінен үш ауылда жөндеу жұмыстары жүргізілмек. Қылышбай ауылындағы үш көшені жөндеуге – 53,3, Ақсүйек ауылындағы үш көшеге – 76,1, ал Назарбеков ауылындағы екі көшені орташа жөндеуге 36,5 миллион теңге бөлінген екен.

Бұдан бөлек, аудандық маңызы бар 161,2 шақырым жолды күтіп ұстау жұмыстары да назардан тыс қалмайтын көрінеді. Ол үшін 46 миллион теңге қарастырылып, жолдарды қардан тазарту, тегістеу және жөндеу жұмыстары жүргізілмек. Ал жол сапасын бақылау мақсатында «Ұлттық жол активтері сапа орталығына» 10 миллион теңге аударылған.

– Мыңарал ауылдық округіндегі Қашқантеңіз ауылының тұрғындары үшін су құбырын тарту жобасы әзірленді. Бұл мақсатқа жергілікті бюджеттен 21 миллион теңге бөлініп, мемлекеттік сатып алу конкурсы арқылы «Диас» жауапкершілігі шектеулі серіктестігі жобалау жұмыстарын жүргізеді. Жобалық-сметалық құжаттамасы мемлекеттік сараптамадан оң қорытынды алып, 2025 жылы республикалық және облыстық бюджеттен 111,1 миллион теңге қаржы бөлу қарастырылды. Бурылбайтал елді мекенін таза ауызсумен қамту үшін кешенді блок-модуль орнату жоспарланған. Елді мекеннің су көзі Балқаш көлі болғандықтан, су модульге жеткізілмес бұрын арнайы сүзгіден өтіп, толық тазартылуы қажет. Осы мақсатта жобалық-сметалық құжаттамасы дайындалып, сараптамадан өтті. 2025 жылы республикалық және облыстық бюджет есебінен 197,5 миллион теңге бөлу көзделіп отыр. Бірлік ауылының ауызсу құбырын қайта жаңғырту жұмыстары да күн тәртібінде тұр. Жобаның сметалық құжаттамасын «АлмазПроекСтрой» жауапкершілігі шектеулі серіктестігі әзірледі. Мемлекеттік сараптаманың оң қорытындысы алынған. Жалпы жоба құны – 560,2 миллион теңге. Қаржыландыру үшін облыс әкімдігі энергетика және тұрғын үй-коммуналдық шаруашылық басқармасына бюджеттік өтінім тапсырылды. Биназар ауылының су құбырын қайта жаңғырту жобасына аудандық бюджеттен 18,5 миллион теңге бөлініп, мемлекеттік сатып алу конкурсының жеңімпазы ретінде «Диас» жауапкершілігі шектеулі серіктестігі анықталды. Жоба толық әзірленіп, сараптамадан өтті. Оның жалпы құны – 719,1 миллион теңге. Бұл нысанның да қаржыландыруына бюджеттік өтінім берілді. Мойынқұм ауылын сумен жабдықтау және су тарату жүйесін жаңғырту жұмыстары бойынша жобалық құжат әзірлеуге аудандық бюджеттен 13 миллион теңге бөлінді. Жобаны әзірлеумен «ШымГОРПроект» жауапкершілігі шектеулі серіктестігі айналысты. Қазіргі таңда құжаттамаға қатысты сараптамадан оң қорытынды алынып, оның жалпы құны 1 миллиард 280 миллион теңгеден асты. Жобаны қаржыландыру үшін 2025 жылдың республикалық және облыстық бюджеттерін нақтылау кезінде өтінім ұсынылды. Жалпы, ауданда ауызсу мәселесін шешу бойынша жүйелі жұмыстар жүргізіліп келеді. Алдағы жылдары ауыл тұрғындары таза әрі тұрақты ауызсумен қамтылып, тіршілік нәрін толыққанды пайдалану мүмкіндігіне ие болмақ, – дейді Сәбит Көбейұлы.

Мыңарал ауылында тозығы жеткен және өткізу қабілеті төмен электр желілерін жаңарту мақсатында 6-10 және 0,4 киловольттық қуаттылықтағы тарату желілерін қайта жаңғырту жобасы қолға алынған. Бұл жобаға 2022 жылы 13,4 миллион теңге бөлініп, жобалық-сметалық құжаттама әзірленіпті. Мемлекеттік сараптамадан оң қорытынды алынып, жалпы жоба құны 446,3 миллион теңге болып бекітілген. Осы жылы республикалық және облыстық бюджет есебінен 155 миллион теңге қаржы бөлу жоспарланған.

Ақсүйек және Мирный ауылдарын жарықтандыру және электрмен жабдықтау желілерін тарту жобалары да әзірленіпті. Ақсүйек ауылындағы электр желілерін жүргізуге арналған жоба 222,6 миллион теңгеге бағаланса, Мирный ауылындағы жұмыстардың құны 73,3 миллион теңгені құрайды. Өткен жылдың қаңтар айында бұл жобалар бойынша облыстық бюджеттен қаржы бөлуге өтінім ұсынылып, осы жылға республикалық және облыстық бюджеттен 222,6 миллион теңге қарастырылған. Аталған жобалар іске асқан жағдайда тұрғындар сапалы әрі тұрақты электр қуатымен қамтамасыз етілетін болады.

Нұрым СЫРҒАБАЕВ