Жиында алғашқы болып облыс әкімдігі білім басқармасы басшысының орынбасары Ләззат Қызылқұлова сөз алып, атқарылып жатқан жұмыстарға тоқталды.

– Кәмелетке толмағандар арасындағы құқықбұзушылықтардың алдын алу мақсатында облыста 93 мобильдік топ, ал колледждерде 14 мобильдік топ құрылған. Бұл топтар прокуратура органдарының бұйрығымен жасақталған және олардың құрамында прокуратура, полиция, білім салаларының 1 144 өкілі бар. Сонымен қатар облыстық полиция департаментінің басшылық құрамынан 42 қызметкері және 517 полиция қызметкері облыстың білім беру ұйымдарына бекітілді, – деген Ләззат Әбілдақызының айтуынша, 2024 жылдың қаңтар-наурыз айлары аралығында полиция қызметкерлерімен бірлесе отырып, өңірдің білім беру ұйымдарында 1047 толеранттылық сабағы, 675 кездесу, 370 «дөңгелек үстел» отырысы, 151 семинар-тренинг өткізілген.

Ата-аналарды құқықтық сауаттандыру да назардан тыс қалмаған. Облыстағы барлық мектептерде ата-аналарды педагогикалық қолдау орталықтары құрылып, «Бала қауіпсіздігі – қоғам келешегі» тақырыбында педагогикалық ұжым мен ата-аналардың жалпы жиналыстары өткен. Бұл жиындарға 14 817 педагог пен 79 398 ата-ана қатысқан.

Білім беру ұйымдарында жеке қауіпсіздік тақырыбында сынып сағаттары апта сайын өткізіледі. Ал ата-аналарды педагогикалық қолдау бағдарламасы аясында 9 247 сабақ ұйымдастырылып, оларға бастауыш сынып оқушыларының – 73 216, 5-9-сынып оқушыларының – 90 315, 10-11-сынып оқушыларының 18 630 ата-анасы қатысқан.

2024 жылы үкіметтік емес ұйымдармен бірлесе отырып білім беру ұйымдарында республикалық деңгейде финдік «KiVa» және «ДосболLIKE» жобалары, ал облыстық деңгейде «Бестерек», «Komek Stop Bullying», «HR+» автоматтандырылған психологиялық-педагогикалық мониторинг жүйесі (АСППМ) және «Кел, дос болайық!» жобалары іске асырылған. Сонымен қатар балаларға кеңес беру және шұғыл көмек көрсету үшін мектептерде республикалық «111» және облыстық «109» байланыс орталықтары іске қосылып, «Komek Stop Bullying» жобасының QR-код парақшалары орналастырылған.

– Өткен жылы құқықтық кеңестердің шешімімен мектеп жарғысы мен ішкі тәртіп ережелерін бұзған 490 оқушы мектепішілік есепке алынды. Ал 2023 жылы бұл көрсеткіш 395 болған еді. Қазір мектепішілік есепте 587 оқушы тұр. Олардың бос уақытын тиімді өткізу мақсатында түрлі үйірмелер ұйымдастырылды, – деді Ләззат Қызылқұлова.

Сондай-ақ, полиция бөлімдерінің есебінде тұрған 128 оқушы да түрлі үйірмелерге тартылған. Ал тұрмысы қолайсыз отбасылардан шыққан 310 баланың 184-і спорт секцияларына, 21-і қолөнер, 11-і сурет, 14-і шығармашылық үйірмелерге қамтылған.

Облыс әкімдігі мен облыс прокуратурасы бекіткен «Қауіпсіз балалық шақ!» жобасын 2025 жылы іске асыру жоспарына сәйкес, 17 наурызда өткен білім басқармасының алқа мәжілісінде колледжішілік және мектепішілік есепке алуды жүргізу аясында кейс-менеджмент тетігін енгізу мәселесі қаралған. Нәтижесінде білім бөлімдері мен білім мекемелерінің басшыларына нақты тапсырмалар беріліп, кейс-менеджменттің қадамдық жоспары бекітілген. Кейс-менеджмент тетігінің «Кәмелетке толмаған баланың денсаулық жағдайы және дамуы», «Кәмелетке толмағанның интеграциясы», «Отбасы және әлеуметтік орта» және «Мәселелерді шешу» сынды 4 негізгі бағыты бар.

Отырыста психологтардың жетіспеушілігі, психолог мамандарының біліксіздігі, ата-аналардың жауапкершілігі, жасөспірімдердің қарапайым заң талаптарын білмеуі сынды мәселелер сөз болды.

Жиынды қорытындылаған облыс әкімінің орынбасары Серік Жақсылықұлы көтерілген мәселелердің оңтайлы шешімін табу, шалыс басқан жастарды түзу жолға салу қоғамның міндеті екенін жеткізді. Сондай-ақ жасөспірімдердің қате қадам жасаудан сақтандыруға құқық қорғау органдары ғана емес, әрбір азамат жауапты болуға тиіс екенін атап өтті.

Айжан ӨЗБЕКОВА