Соңғы жылдары елімізде жеке емдеу кабинеттері көптеп ашылып, халық арасында үлкен сұранысқа ие болды. Шағын денсаулық орталықтарында медбикелер емделушілерге дәрігердің қатысуынсыз, түрлі медициналық қызметтерді көрсете алады. Атап айтқанда қан алу, жараны таңу, дәрі-дәрмек енгізу сияқты процедуралар жасалады. Бұл өз кезегінде тұрғындарға уақыт үнемдеуге және қызметтерді жылдам алуға мүмкіндік береді.
Алайда, мұндай кабинеттердің заңды түрде жұмыс істеуі маңызды. Медициналық және фармацевтикалық бақылау комитетінің деректеріне сәйкес, өңірде жүзден астам жеке емдеу кабинеті тіркелгенімен, олардың тек 42-сі ғана ресми лицензия алған. Мысалы, Таразда 70-тен астам кабинет болса, олардың 31-і ғана заңды түрде жұмыс істейді.
Аталған комитеттің өңірлік департаментінің басшысы Айгүл Балғабаеваның айтуынша емдеу кабинеттері тек емханалар мен медициналық орталықтардың құрамында ғана жұмыс істеуі тиіс. Шағын медициналық мекемелер тұрғындардың денсаулығына қатысты барлық талаптарды сақтаса, халық үшін тиімді әрі қауіпсіз емдеу орталығына айнала алады.
Қалай десек те мұндай орталықтар халық үшін өте ыңғайлы. Себебі олар емханаға бармай-ақ, кішігірім процедураларды тез әрі арзан бағада ала алады. Алайда медициналық қызметтерді алғанда, кабинеттің лицензиясын тексеру маңызды.
А.БЕКЕНҚЫЗЫ
Алдыңғы мақала
Келесі мақала
Әбіл Нүсіпбаев «Халық қаһарманы» атануға лайықты
Ұқсас жаңалықтар
