Мемлекет басшысы Қасым-Жомарт Тоқаев жастарды кәсіптік салаға бейімдеу, еңбек нарығына қажетті мамандарды даярлау мәселесін ерекше назарға алып, 2025 жылды «Жұмысшы мамандықтары жылы» деп жариялаған болатын. Осыған сәйкес техникалық және кәсіптік білім беруді дамыту орталығы аймақтағы оқу орындарының әлеуетін арттыру бағытында кешенді жұмыстар атқаруда. Орталық техникалық және кәсіптік орта білім беру ұйымдарының білім сапасын жақсарту үшін жаңа әдістемелерді енгізіп, инновациялық технологияларды қолдану арқылы білім берудің тиімділігін арттыруға күш салуда. Әсіресе бастауыш және педагог кадрлардың кәсіби құзыреттілігін дамытуға ерекше көңіл бөлініп, арнайы тренингтер мен әдістемелік қолдау көрсетілуде.

– Бүгінде осы бағыттағы оқу орындары мен өндірістік кәсіпорындар арасындағы әріптестік байланыстарды нығайту, түлектерді жұмыспен қамту көрсеткішін арттыру мақсатында дуальді оқыту жүйесін дамыту жұмыстары жалғасуда. Қазіргі таңда білікті жұмысшы мамандарға сұраныс артып келеді. Осыған орай, техникалық және кәсіптік білім беру ұйымдары білім алушыларға заманауи өндірістік жабдықтармен жұмыс істеуді үйретіп, нарық талаптарына бейімделген бағдарламаларды іске асыруда. Сонымен қатар кәсіптік білім беру жүйесін одан әрі жетілдіру жолында тың жобаларды жүзеге асыру жоспарланды. Алдағы уақытта жаңа оқу бағдарламалары енгізіліп, материалдық-техникалық база нығайтылып, жұмысшы мамандықтарына деген қызығушылықты арттыруға бағытталған іс-шаралар ұйымдастырылады, – деді Дархан Кеңесбекұлы.

Техникалық және кәсіптік білім беруді дамыту – елдің әлеуметтік-экономикалық өсіміне ықпал ететін маңызды факторлардың бірі. Осы саладағы жүйелі реформалар жастардың сапалы білім алып, бәсекеге қабілетті маман ретінде қалыптасуына мүмкіндік береді.

Ақжүніс НАҚЫПЖАНҚЫЗЫ,

М.Х.Дулати атындағы Тараз

университетінің 4-курс студенті