Спикердің айтуынша, 2024 жылдың қорытындысы бойынша 9 303 адам қатерлі ісікпен есепте тұрса, 2025 жылы қатерлі ісік алғаш рет анықталған аурулар саны 1 636 адамды құраған.

– Былтыр онкологиядағы қатерлі ісік көрсеткіші 26,7 пайызды құрады. Статистикаға жүгінсек, облыста 2024 жылы обыр ауруларының үлес салмағы бойынша сүт безі қатерлі ісігі бірінші орынға шыққан. Екінші орында өкпенің қатерлі ісігі тұр. Сонымен қатар үшінші болып асқазан қатерлі ісігі мен жатыр мойнының қатерлі ісігі орын алып отыр. Тоқішек және тікішек қатерлі ісігі қатерлі ісіктердің құрамы бойынша төртінші және бесінші орында тұр, яғни тоқішек қатерлі ісігі 4,8 пайыз, тікішек қатерлі ісігі 3,4 пайызды құрайды. 2024 жылдың қорытындысы бойынша тоқішек және тікішек қатерлі ісігімен 299 адам есепке алынған. Осы жылы тоқішек, тікішек обырын анықтау негізінде 58 796 адам скринингтік тексеруден өтті. Тексеру барысында 17 адамнан тоқішек, тікішек қатерлі ісігі анықталды. Оның жетеуі бірінші сатысы, тоғызы екінші сатысы, ал бір адам үшінші сатысы бойынша тіркелген. Бұл скрининг тексеру негізінде нысаналы топтағы ерлер мен әйелдердің жасы 50-ден бастап 70 жасқа дейінгі аралықты қамтиды және осы жастағы адамдар әр екі жыл сайын жергілікті емханада қан талдауын тапсыруы қажет. Тағы бір маңызды мәселе, жатыр мойны қатерлі ісігінің алдын алудың бір түрі – 11 жастағы қыздарға АПВға қарсы екпе егу жұмысы. Бұл жұмыс әлем бойынша 107 елде жүргізіледі, оның ішінде Өзбекстан, Қырғызстан да бар. Облысымызда да бұл шара қолға алынып, АПВға қарсы вакцинация 2024 жылдың күз мезгілінде бастау алды. Вакцинациядан кейін асқынулар тіркелмеген, – деген Гүлжан Әбдіхалыққызы тоқішек және тікішек қатерлі ісігінің белгілеріне және оның себептеріне тоқталып өтті.

Оның сөзінше әлсіреу, ауа жетіспеу, үлкен дәреттің дұрыс жүрмеуі, іштің қатуы, іштің өтуі, салмақ жоғалту, іштің түйілуі және кебуі секілді белгілер анықталған жағдайда дереу дәрігерге жүгіну керек.