Жалпы Жоғарғы спорт шеберлігі мектебінің негізгі мақсаты – белгіленген спорт түрлері бойынша Қазақстан Республикасының ұлттық құрама командаларының негізгі құрамына спортшыларды іріктеу және дайындау. Сондай-ақ спортшылардың жарыстарға қатысуын қамтамасыз етіп, олардың сәтті өнер көрсетуіне жағдай жасау, дайындық процесін материалдық-техникалық, әдістемелік және медико-биологиялық тұрғыдан қолдау да маңызды міндеттердің қатарында. Осы мақсатта оқу-жаттығу сабақтары спорттық-сауықтыру лагерьлері, оқу-жаттығу жиындары және спорттық жарыстарды қамтитын 52 аптаға жоспарланған бағдарламалар негізінде өткізіледі.

– 2024 жылы спортшыларымыз бірқатар ресми жарыстарға қатысып, жоғары нәтижелерге қол жеткізді. Олимпиада ойындары, әлем және Азия чемпионаттары мен кубоктары, халықаралық турнирлер және Қазақстан Республикасының чемпионаттары мен кубоктарында барлығы 280 медаль жеңіп алдық. 2024 жылы Францияның Париж қаласында өткен ХХХІІІ Жазғы Олимпиада ойындарына мектебімізден төрт спортшы қатысты. Дзюдо күресі бойынша 60 келі салмақта Елдос Сметов пен 73 келі салмақта Данияр Шамшаев өз бақтарын сынады. Нәтижесінде Елдос Сметов алтын медаль жеңіп алып, қазақ спорты тарихындағы дзюдодан тұңғыш Олимпиада чемпионы атанды. Сонымен қатар бірнеше спортшымыз еркін күрес, грек-рим күресі, қазіргі бессайыс, таеквондо, жеңіл атлетика және веложарыс секілді спорт түрлерінен жоғары нәтиже көрсетіп, қоржынымызды толықтырды, – деді Рахман Тастеков.

Рахмет Зиядаұлының айтуынша, алдағы басты міндет – 2025 жылы жас ерекшеліктеріне қарай әлем және Азия чемпионаттарына дайындалу, сондай-ақ 2026 жылы Жапонияда өтетін Жазғы Азия ойындары мен Лос-Анджелесте жалауын желбірететін Жазғы Олимпиадаға іріктелетін спортшыларды даярлау.

Бүгінгі таңда Жоғарғы спорт шеберлігі мектебінде спорт түрлеріне қарай 189 (161 негізгі, 28 ауыспалы) спортшы жаттығуда. Барлығы 96 спортшы Қазақстан Республикасының ұлттық құрама командаларының сапына енген.

Мұқағали БАЛТАБАЕВ