Байқау «Балаларға арналған ұлттық киім», «Заманауи үлгідегі ұлттық киім» және «Ұлттық киімге арналған аксессуарлар» атты үш аталым бойынша өтті. Сайысқа М.Х.Дулати атындағы Тараз университеті мен «Тігінші», «Киім дизайнері-модельер», «Декоративті-қолданбалы өнер» және «Халықтық қолөнер» мамандықтары бойынша білім беретін сегіз колледжден 41 студент қатысты.

Қазақы өнер ұлықталған байқауда студенттер ұлттық нақыштағы сәнді киімдер мен аксессуарлар әзірлеп, өз шеберліктерін паш етті. Әр туынды тек қолөнер ғана емес, автордың жандүниесін, ұлттық мәдениетке деген сүйіспеншілігін бейнелейтін өнер туындысы іспетті болды. Бірі ою-өрнекпен көмкерілген нәзік көйлегімен сахнаға шықса, енді бірі сәнді камзол мен ұлттық стильдегі күрделі пішімді шебер үйлестіре білді. Балаларға арналған киімдер аталар мен әжелердің ақ батасын алғандай әсер қалдырса, ұлттық аксессуарлар қазақы рухты заманауи сәнмен астастыра отырып, ерекше стиль қалыптастырды.

Сән көрсетілімдерін белгілі дизайнерлер Ирина Набоко мен Малика Құлахметова «Хан шапан» брендімен өткізгенін айта кеткен жөн.

Бағалау барысында жұмыс сапасы, қолданылған технологиялар мен авторлардың өз туындыларын таныстыруы ескерілді. Финалда киімдер сән көрсетілімінде ұсынылды. Қатысушылардың еңбегін сарапшылар жоғары бағалады.

– Әр жас дизайнердің жұмысы өзіндік қолтаңбасымен ерекшеленді. Бірі нәзіктік пен талғампаздықты, енді бірі ұлттық дәстүр мен жаңашылдықты үйлестіре білді. Бұл олардың сән әлеміне деген құштарлығын айқын көрсетті, – деді дизайнер Ирина Набоко.

Әр номинацияның жеңімпаздары дипломдармен және бағалы сыйлықтармен марапатталды. Олардың қатарында бу үтіктері, оверлоктар мен кәсіби тігін машиналары болды. Барлық қатысушыларға естелік сыйлықтар мен алғыс хаттар табысталды.

«Заманауи үлгідегі ұлттық киім» аталымында Кордай ауданындағы №7 Бетқайнар колледжінің студенті Жанерке Боранбай жеңіске жетті. Екінші орынды осы оқу орнының студенті Фатима Кинхузова еншілесе, үшінші орынды Жамбыл политехникалық жоғары колледжінің студенті Ақнұр Тұрсын иеленді.

«Балаларға арналған ұлттық киім» аталымы бойынша да №7 Бетқайнар колледжінің студенті Сулийя Малянщи үздік атанды. Кұлан агротехникалық жоғары колледжінің студенті Әлия Шадыхан екінші орынға ие болса, ал үшінші орын Жамбыл политехникалық жоғары колледжінің студенті Айжамал Аманғазыға бұйырды.

«Ұлттық киімге арналған аксессуарлар» аталымында №10 Шу колледжінің студенті Зейнеп Абдулсаттарқызы жеңімпаз  деп танылды. Тараз сервис және технология колледжінің студенті Милана Горбачева екінші орынды иеленсе, үздік үштікті Тараз инновациялық көпсалалы колледжінің студенті Қарақат Әбдібай түйіндеді.

Тағы бір айта кетерлігі, байқауға қатысқан жалғыз ер жігіт – Жамбыл политехникалық жоғары колледжінің студенті Азамат Сембектің қолөнер бұйымдары да көптің көңілінен шықты. Сайыстың жоғары деңгейде өтуіне демеушілер, кәсіпкер әйелдер мен облыстық іскер әйелдер қауымдастығының мүшелері қолдау көрсетті. Тарқатып айтсақ, демеушілер қатарында Ләззат Жабатаева, Перуза Ортаева, Меркі ауданынан Әлия Әубәкірова, сондай-ақ Күлзахира Әбдезова, Айнұр Жексембинова, Жаннат Ертаева, Гүлназ Ноғаева және Жамбыл ауданынан Ботагөз Тоқсейтова сынды белсенді келіншектер бар.

Сонымен қатар қатысушыларға сән және дизайн саласының үздік мамандары Малика Құлахметова, Тахмина Нұралиева, Светлана Яковина, Айнұр Бастаубаева, облыстық іскер әйелдер қауымдастығының төрайымы Меруерт Лештаева, сән үйінің жетекшісі Ирина Набоко, «Заңғар бренд» шеберханасының иесі Бекзат Өмірбекова, «Шебер шаңырақ» қоғамдық бірлестігінің төрайымы Анар Бексұлтанова, «Dana-Del» тігін цехының жетекшісі Бақытгүл Тоқтыбаева және «Тараз-Қазақстан» суретшілер одағының негізін қалаушы Елена Голубинская брендтік сыйлықтар тарту етті.

«Жас шебер» байқауы жас дизайнерлерге өз өнерін шыңдауға мүмкіндік берді. Ұлттық киімдер мен аксессуарлар әзірлеген студенттер өз шеберліктерін жоғары деңгейде көрсетті. Жеңімпаздар марапатталса, барлық қатысушылар құрметке бөленді. Ұйымдастырушылар олардың болашақта сән және дизайн саласында биік белестерді бағындыратынына сенім білдірді.

Ақтоты ЖАҢАБАЙ