Осы орайда фестивальдің ұйымдастырушысы, Ықылас Дүкенұлы атындағы қалалық мәдениет үйінің әдістемелік бөлімінің меңгерушісі Байжан Әбеков бұл сайыстың берері мол екенін жеткізді.

 – Ең алдымен ата-баба дәстүрін өскелең ұрпаққа кеңінен насихаттап, олардың бойына ұлттық рухты сіңіруді көкседік. Ұлттық ойындар нағыз тәрбиенің, намыстың, қайрат пен рухтың мектебі. Әр ойында өмірлік мән жатыр. Жарыс барысында жастардың алаңсыз, шын ықыласпен қатысып жатқанын көргенде бұл дәстүрдің ұрпақ санасында өшпейтініне куә болдық, –  деді Б.Әбеков.

Бұл күні қала мектептері оқушыларынан құралған командалар сайыстарда өз күштері мен ептіліктерін сынады. Ойын барысында жігіттер садақ тартып, нысана көздеді. Асық ойыны да қызықты өтті.

Нағыз ер-азаматтар жиналған фестивальдің ерекше кезеңі – арқан тарту мен білек күресі болды. Бұл сәтте әр команда намысты қолдан бермеуге тырысты. Ал кіртас көтеру сайысы жігіттердің шыдамдылығы мен күшін сынға салды. Сондай-ақ ұлттық спорттың бір тармағы саналатын ләңгі тебу де көптің көңілінен шықты. Ләңгінің әр серпілуі қазақ баласының шапшаңдығы мен ептілігін паш еткендей болды.

Жарыс қорытындысы бойынша, бірлік пен мықты дайындықтың үлгісін көрсеткен «Тараз» командасы қарсыластарын шаң қаптырып, жеңіс тұғырынан көрінді. Олар әр сайыста жігер танытып, ұйымшылдық пен төзімділіктің үлгісін көрсетті. Екінші орынды №3 мектеп- лицей оқушыларынан құралған «№3 ML жігіттері» командасы иеленді. Олар да өз кезегінде жеңіске деген құштарлықтарын, мықты дайындықтарын дәлелдей білді. Үздік үштікті қайсарлықтарымен көзге түскен «13-аймақ» командасы түйіндеді.

 – Біздің балалар әрдайым спортпен айналысады, түрлі үйірмелерге қатысып, спортзалға тұрақты барып тұрады. Бірақ ұлттық ойындар фестивалі олар үшін ерекше тәжірибе болды. Бұл – өз күштерін сынап қана қоймай, ата-бабадан қалған мұраға жақындауға мүмкіндік берген ерекше шара. Әрине, жеңіс –әркімнің арманы. Бірақ ең бастысы, балаларымыз осындай тарихи әрі тағылымды шараның бел ортасынан табыла  білді. Олар бүгінгі күннен алған әсері мен тәжірибесін ұмытпайды деп ойлаймын. Бұл  алдағы күнге үлкен мотивация болды, – деп ойын жеткізді Тараз қаласындағы №7 мектеп-гимназияның мұғалімі  Татьяна Арская.

Шара соңында жеңімпаздар мен жүлдегерлер арнайы дипломдармен және бағалы сыйлықтармен марапатталды. Ал барлық қатысушыларға ұлттық мұраға деген құрметтері мен белсенділіктері үшін алғыс айтылды.

– Осындай фестивальдар жастарды бір арнаға тоғыстырып, ұлттық болмысымызды қайта жаңғыртады. Мұндай игі бастамалар жиі өткізіліп тұрса екен деймін. Себебі біз өз тарихымыз бен  мәдениетімізді тек осындай жолмен ғана ұрпақ санасына сіңіре аламыз. Ұлттық ойындар – ата-бабамыздың бізге қалдырған баға жетпес аманаты. Оны сақтау әр қазақтың парызы деп білемін, – деді тараздық тұрғын Ермек Жанұлы.

Бұл күні ұлттық құндылықтар ұлықталып, ата-баба аманаты дәріптелді. Әрбір жас жеткіншек ұлттық ойындар арқылы елдіктің, бірліктің, намыстың не екенін ұғынды.

Ақтоты ЖАҢАБАЙ