Ларкиана қылқаламды алғаш рет қолына ұстаған сәтін әлі күнге дейін ұмытпайды. Қарапайым қаламмен қағаз бетін шимайлап бастаған қыз бала, уақыт өте келе, түрлі бояулардың құдіретін сезініп, сурет өнерінің кең әлеміне бойлады. Ол үшін сурет – ойдың көрінісі, жүректің үні, жандүниенің шынайы айнасы. Оның әрбір туындысынан нәзіктік пен терең ой, сыр мен сезім қатар өріледі.

– Сурет салу – мен үшін өз әлемімді құру. Әрбір жұмысымда ішкі жандүниемді, көңіл күйімді көрсетуге тырысамын. Кейде қолыма қылқалам тиген сәттен бастап айналамдағы дүниені ұмытып кетемін. Тыныштықта өзіңмен-өзің отырып сурет салғанның жайы бөлек. Нағыз рақат осы сәтте басталады, – дейді жас суретші.

Ларкиана көбінесе портрет жанрында жұмыс істейді. Адам бейнесі арқылы ішкі сезімнің қыр-сырын ашу– суретшінің  басты мақсаты. Оның айтуынша, портрет – ең қиын әрі  қызықты жанр. Себебі әр адамның көзінде, болмысында қайталанбас ерекшелік бар. Соның бәрін бояу арқылы жеткізе білу үлкен шеберлікті талап етеді.

Өз жұмыстарында жас талант акварель мен цифрлық графика тәсілдерін қатар қолданады. Ларкиананың жанына әсіресе акварельдің нәзіктігі мен жеңілдігі ерекше ұнайды. Ал цифрлық өнер оған шығармашылық еркіндік береді. Түрлі стильдер мен түстер палитрасын батыл үйлестіріп, жаңа бейнелер мен идеяларды жүзеге асыруға жол ашады.

Өнерлі ару шабытты табиғат пен адамдардың сезімінен алатынын жеткізді. Яғни пенденің бойындағы қуаныш, реніш, мұң-қайғы, уайым, бақыт, махаббат секілді эмоцялар суретшінің жүрегінде өшпес із қалдырып, сол әсермен сезімге толы туындысын жазады.

– Адамның көзіне мұқият қарасаңыз, жанарында өмірі мен ішкі ойы тұнып тұрғанын байқай аласыз. «Көз жанары – адамның айнасы» деген сөз осындайда айтылса керек. Шығармашыл адамдарда өзге пенденің ойын сөзсіз ұғынатын қасиет болады. Мен де солай терең үңілу арқылы кез келген жанның ішкі сырын оқи аламын. Адамдардың сезімі жаныма ерекше әсер етіп, шабытымды шыңдай түседі. Содан болар, суретім өмірдің өзіндей шынайы шығады. Портрет жанрының жаныма жақын болуына адамдар эмоциясын бақылауға деген құштарлығым себеп шығар, – деп толықтырып өтті сөзін суретші ару.

Ларкиана үшін музыка тыңдау, фильмдер көру мен көркем әдебиетті парақтау да шабыт көзіне айналған. Әуен мен романдардағы әдемі теңеулер оның қиялын ұштап, жаңа туындыларды салуға себеп болады. Музыка демекші, Ларкиана бос уақытында укулеле аспабында ойнайды. Оның айтуынша, әуен мен сурет – бір-бірімен тығыз байланысты екі әлем. Әуен көңіл күй сыйлап қана қоймай, ойына түрлі идеялар әкеледі екен.

Талапты қыздың сурет салатын уақыты да көңіл күйіне байланысты. Кейде шабыт бірден келсе, кейде түннің бір уағына дейін қылқаламынан айырылмайды. Жарық сөніп, айнала түн тыныштығына шомғанда оның ойы мен қиялы жаңа бояу, жаңа бейне іздейді.

Бүгінде Ларкиана бейнелеу өнерін арнайы курс арқылы дамытып жүр. Сонымен қатар сәулет негіздерін меңгеріп, кеңістік пен пропорцияны дұрыс түсінуге бет бұрған. Бұған дейін арнайы білім алмаса да өздігінен ізденіп, талмай еңбектенуінің арқасында көптеген дүниені меңгерген. Сәулет сабағы оған кеңістікті сезінуді, үйлесімділікті, композиция құруды үйретіп, шығармашылығын жаңа деңгейге көтеруде.

Жас суретші жыл сайын бір портретті қайта салып, өз қолтаңбасы мен шеберлігінің өскенін бақылайды. Бұл – оның өнерге деген құрметі мен өз-өзін дамытуға деген талпынысының айқын көрінісі. Өнерлі бойжеткен өз еңбегіңнің жемісін көріп, алға жылжып келе жатқаныңды сезіну үлкен мотивация деп санайды.

Ларкиананың қиялынан шыққан сүйікті жұмыстарының бірі – «Періште-қыз» портреті. Бұл туындысында суретші нәзіктік пен тазалықты бейнелегісі келген. Оның айтуынша, бұл сурет  өзінің ішкі эмоциясын барынша дәл жеткізген ерекше туындысы. Анасына арнап салған «Жақын жан» атты картинасы да ерекше ыстық. Бұл туындыда ол анасына деген махаббат пен жылулықты бояу арқылы жеткізе білген.

Өзін шабыттандыратын тұлғалар қатарында Ларкиана атақты теңіз суретшісі Айвазовский мен қазіргі заманғы иллюстратор «Dana_delion» шығармашылығын атайды. Айвазовскийдің теңізге деген сүйіспеншілігі мен жарық пен көлеңке ойыны оны ерекше әсерге бөлесе, «Dana_delion»-ның батыл түстер палитрасы мен заманауи стилі цифрлық өнерге қызығушылығын арттырған.

– Өнер – ой мен сезімнің тоғысқан жері. Бойыңдағы қабілетің арқылы қоғамның өзекті мәселелерін көтеруге болады. Шығармашылық адамын айналасында болып жатқан мәселелер ойландырмай қоймайды. Әлсіздерге көрсетілген әділетсіздік, табиғатқа жасалып жатқан қиянат, нәзікжандылардың ауыр тағдыры жаныма батады. Қоғамды алаңдатқан мәселені тақырыбыма арқау етіп, көрген жанды ойландыратын, ішкі жандүниесін алай-дүлей еткізетін ерекше туындыны жарыққа шығарғым келеді. Өз ойыңды ашық айтып, көпшілікке ой салу – нағыз суретшінің ғана қолынан келетін дүние. Мен де кәсіби суретші ретінде өз жолымды қалыптастырып, әр туындым арқылы көрермен жүрегіне жол табуды армандаймын, – дейді жас суретші.

Ларкиананың бір жоспары – алдағы уақытта өз жеке көрмесін өткізу. Бұл көрмеде ол қоғамда қордаланған мәселелерді өнер тілімен жеткізгісі келеді.

Кейіпкеріміздің өнер байқауларында қол жеткізген жетістіктері де аз емес. Ол облыстық бірнеше байқаудың жүлдегері. Тарқатып айтсақ, биыл облыстық «Қазақ даласының қазыналары» байқауында екінші орын иеленсе, «Шығыс ертегісі» атты көркемсурет байқауында да жүлдегер атанған. Бұл – оның таланты мен еңбегінің айқын дәлелі.

Ларкиананың шығармашылығына әрдайым бағыт-бағдар беріп, қолдау көрсетіп жүрген ұстазы – Жұлдыз Ілиясқызы. Ұстазының пікірінше, Ларкиана табиғатынан дарынды, еңбекқор суретші.

– Ларкиана – ерекше талант иесі. Оның әрбір жұмысы сезімнен туған. Бояу таңдауы, композиция құруы – бәрі ерекше нәзік талғаммен жасалады. Ол үнемі ізденіс үстінде, өзіне сын көзбен қарайтын шәкірт. Мен шәкіртімнің болашағынан зор үміт күтемін. Оның есімі алдағы уақытта өнер әлемінде үлкен орын алатынына сенемін, – дейді Ж.Ілиясқызы.

Ларкиана үшін бейнелеу өнері – өмірінің ажырамас бөлігі. Оның жанын түсінетін, тыныштық сыйлайтын ерекше әлем. Болашақта ол өзінің жеке көрмесін ұйымдастырып, ұлттық мәдениет, экология және адам эмоциясы тақырыбында тың туындылар жасауды армандайды. Сол көрмеде батыл ойларын, нәзік сезімін, қоғамға деген үндеуін өнер арқылы жеткізбек.

Туындылары арқылы көрерменмен үнсіз сырласуды мақсат тұтқан жас суретшінің мақсаты айқын, арманы асқақ. Оның өнерге деген махаббаты мен еңбекқорлығы алдағы уақытта әлі талай биік белестерге жетелейтініне сенім мол.

Ақтоты ЖАҢАБАЙ