Наурыз – көктемнің жаршысы, Жаңа жылдың бастауы ғана емес, бүкіл халқымыздың ынтымағы мен бірлігін нығайтатын ерекше мейрам. Бұл – табиғат пен адамзаттың үндестігін дәріптейтін, мейірім мен жақсылықты ту ететін ұлық мереке.
Наурыз – сан ғасырдан бері татулық пен келісімнің, береке мен ырыстың белгісі. Қазақ жерінде достық пен бірлікке негізделген қоғам құруда Қазақстан халқы Ассамблеясының алар орны ерекше. Әрбір ұлт пен ұлыс өкілінің бейбітшілік пен татулықта өмір сүруі – біздің басты құндылығымыз. Бір шаңырақ астында тату-тәтті ғұмыр кешіп жатқан халқымыздың ынтымағы артып, ырысты өміріміз баянды болсын!
Бүгінде Наурыз мейрамы ұлт пен ұлысты ұйыстырып, қайырымдылық пен жанашырлықтың, өзара қолдау мен сыйластықтың мерекесіне айналды. Бұл күндері ағайын бір-біріне ізгі тілектерін арнап, үлкендерге құрмет көрсетіп, игі істерге бастамашы болады. Ұлыстың Ұлы күні адамзат баласын татулық пен жасампаздыққа үндейтін құндылықтарды дәріптеуімен де ерекше.
Осы тамырын тереңнен тартқан мереке қарсаңында әрбір шаңыраққа молшылық пен бақ-береке, бақыт тілеймін! Ортақ үйіміз – Қазақстанымыз дами берсін.
Ұлыс оң болсын, ақ мол болсын!
Сара ДАУЗОВА,
облыстық Қазақстан халқы Ассамблеясы
Аналар кеңесі төрағасының орынбасары
Алдыңғы мақала
Келесі мақала
Әр шаңыраққа молшылық әкелсін!
Ұқсас жаңалықтар
