Ұлыстың ұлы күнінде ел ағалары халқымыздың амандығын, бірлігін тілеп ақ батасын беріп, ел-жұрт татулыққа бет түзейді. Әр шаңырақтың керегесі кеңейіп, берекесі артады.

Биылғы Наурыз мерекесі облысымызда ерекше сән-салтанатымен өтіп жатыр. Наурызнама онкүндігі жарияланып, әр күн қазақтың тарихы мен мәдениетін, ұлттық болмысын айшықтайтын тағылымды шараларға ұласып отыр. Наурызнама онкүндігінің әр күнінің тәрбиелік мәні зор.

Берекелі Наурыз – өткенді ұлықтап, болашаққа бағыт түзейтін құтты кезең. Бұл мейрам – елдің жаңаруы мен жарқын болашаққа деген сенімінің нышаны. Ынтымағы жарасқан елдің ғана ырысы мол, берекесі таситыны белгілі. Ендеше, осы наурызда халқымыздың бірлігі бекем, тірлігі берекелі болсын!

Ақ түйенің қарны жарылған осы мереке әр отбасына шаттық пен қуаныш әкелсін. Әр үйдің төрінде ақ мол болып, ырыс пен береке орнасын! Дастарқандарыңыз толы, көңілдеріңіз ояу, өмірлеріңіз шуақты болсын!

Ұлыстың ұлы күні құтты болсын! Жылымыз жақсылық пен игілікке, береке мен молшылыққа толы болсын!

Марат АБДРАИМОВ,
облыстық қоғамдық кеңестің төрағасы