Чемпионаттың ашылу салтанатында Жуалы ауданы әкімінің орынбасары Асхат Жабағы ұлттық спорттың өркендеп келе жатқанын айтып, қатысушыларға сәттілік тіледі. Одан кейін аудандық мәслихаттың төрағасы Зиядхан Бүрлібаев пен «АMANАТ» партиясы Жуалы аудандық филиалының төрағасы Марат Нарымбеков жарыстың маңыздылығын атап өтті. Сондай-ақ, Сейітқазы қажы Әбдірұлы жастарға ақ батасын берді.

Алғашқы кездесу Бауыржан Момышұлы мен Мыңбұлақ командаларының арасында өтті. Тартысты кездесудің қорытындысы бойынша 5:3 есебімен Мыңбұлақ құрамасы жеңіске жетті. Одан кейін Қызыларық командасы Ақтөбе командасын 3:0 есебімен ұтты. Үшінші кездесуде Ақсай командасы Бауыржан Момышұлы командасынан айласын асырды.

Төртінші ойында Ақтөбе мен Мыңбұлақ командалары тең түсті. Бесінші кездесуде Ақсай командасы Қызыларық командасын 4:1 есебімен тізе бүктірді. Алтыншы ойында Бауыржан Момышұлы командасы алғашқы жеңісіне қол жеткізіп, Ақтөбе командасын қапы қалдырды. Жетінші кездесуде Ақсай командасы Мыңбұлақты 6:2 есебімен айқын жеңіп, өзінің мықтылығын көрсетті. Сегізінші ойында Қызыларық командасы Бауыржан Момышұлы құрамасынан 4:0 есебімен басым түсті. Ал соңғы ойында Ақтөбе командасы алаңға шықпағандықтан, жеңіс Ақсай командасына берілді.

Чемпионаттың соңғы кездесуінде Қызыларық және Мыңбұлақ командалары өзара сайысып, көрермендерге нағыз тартысты ойын сыйлады. Екі команда да жоғары деңгейдегі ойын көрсетіп, нәтижесінде Қызыларық командасы 3:2 есебімен жеңіске жетті. Осылайша, Қызыларық командасы топтан екінші орынмен жартылай финалға жолдама алды.

Жуалы жерінде тұңғыш рет өткен аталған чемпионат ұлттық спорттың даму жолында жаңа қадам болды. Көкпаршылардың шеберлігі мен жігері көрермендерді тәнті етіп, болашақта мұндай додалардың тұрақты түрде өткізілуіне негіз қалады.

Бақытжан БЕКБОЛАТ,
журналист