Басқосуды Шерхан Мұртаза атындағы Халықаралық Тараз университетінің ректоры, облыстық ҚХА жанындағы ғылыми-сараптамалық топтың төрағасы Махметғали Сарыбеков жүргізді.

Махметғали Нұрғалиұлы клубқа қабылданған жас ғалымдарды жеке-жеке таныстырып, олардың әрқайсысының ғылыми әлеуетін ерекше атап өтті.

«Жас ғалымдар» клубының мүшелері арнайы бекітілген ереже талаптарына сәйкес таңдалды. Құрамына М.Х.Дулати атындағы Тараз университетінің, Шерхан Мұртаза атындағы Халықаралық Тараз университетінің, Әл-Фараби атындағы Қазақ ұлттық университетінің докторанттары, магистранттары, оқытушылары, 4-курс студенттері және «Ассамблея жастары» қоғамдық бірлестігінің мүшелері енді. Клуб мүшелері ашық дауыс беру арқылы бекітіліп, жетекшілері тағайындалды.

Ал «Жас ғалымдар» клубына Шерхан Мұртаза атындағы Халықаралық Тараз университетінің ғылыми жұмыстар және халықаралық байланыстар басқармасының басшысы, PhD докторы Мұрат Әбутәлипов және «Қоғамдық келісім» коммуналдық мемлекеттік мекемесінің ғылыми-сараптамалық қолдау бөлімінің жетекші сарапшысы, әлеуметтік ғылымдар магистрі Рианна Жалпанова жетекшілік ететін болады.

Жиын барысында клубтың алдағы жұмысына байланысты түрлі пікірлер мен ұсыныстар айтылды. Жас ғалымдарға өздеріне жүктелген міндеттерге зор жауапкершілікпен қарап, клуб жұмысын жандандыруға белсенді атсалысу қажеттігі ескертілді.

Іс-шара соңында қатысушылар клуб мүшелеріне ізгі тілектерін білдіріп, бірлескен жұмыстың тиімділігін арттыруға сенім білдірді.

Айжан ӨЗБЕКОВА