Н.Тау алдымен Жамбыл ауданындағы тарихи-өлкетану музейінде желтоқсаншылармен, өңір мұғалімдерімен және жастармен «Вейп – ел жастарының ермегіне айналмауы тиіс» атты тақырыпта кездесу өткізді. Сондай-ақ аудандық орталық аурухананың жұмысымен танысты. Одан соң «Жайлы мектеп» жобасы аясында Байзақ ауданында салынған №7 орта мектептің тыныс-тіршілігімен танысты.

Мәжіліс депутатының жұмыс сапары Тараз қаласында жалғасып, «Анаға тағзым» отбасын қолдау орталығында өңірден шыққан кәсіпкер әйелдермен жүздесті. Жиынды «Respublica» партиясы облыстық филиалының төрағасы Нұрсұлтан Оспанов жүргізді.

Кездесуде Нұргүл Тау Мемлекет басшысы Қасым-Жомарт Тоқаевтың халыққа арнаған Жолдауларында шағын және орта кәсіпкерлікті дамытуға ерекше көңіл бөлініп отырғанын айта келіп, бүгінгі күні кәсіпкерлікке бет бұрған әйелдердің үлесі артып келе жатқанын мақтанышпен жеткізді.

Жиында кәсіпкер әйелдер саладағы қордаланған мәселелерді көтеріп, ойларымен бөлісті. Отандық бизнесте бәсекелестік ортаның жоқтығы, әкімшілік кедергілердің көптігі, кәсіпкерлер өз өнімдерін ірі сауда орталықтары талап ететін тиісті сертификаттардың болмағандығынан шығара алмай отырғандығын сөз етті. Сондай-ақ іскер әйелдер өз тәжірибелерімен де бөлісіп, ұсыныс-пікірлерін айтты. Кәсіпкерлер балабақшалар мен мектептердегі тамақтану жүйесін ұлттық тағамдармен толықтыру, жылқы мен қой етін ас мәзіріне қосу сынды ұсыныстарын ортаға салды.

Іссапар барысында Нұргүл Тау «Үміт» сәбилер үйінің жұмысымен танысып, ондағы тәрбиеленушілерді Жаңа жылмен құттықтады. Сондай-ақ облыстық тұрмыстық зорлық-зомбылықтан зардап шеккен әйелдерге әлеуметтік көмек көрсету орталығына арнайы барды.

Эльмира БАЙНАЗАРОВА