Барша студенттерді осы мерекемен шын жүректен құттықтай отырып, олардың сапалы білім алып, ізгі армандарына қол жеткізулеріне тілек білдіремін.

Шерхан Мұртаза атындағы Халықаралық Тараз инновациялық институты студенттерге қолайлы жағдай жасап, сапалы білім мен жан-жақты дамуды қамтамасыз ету мақсатында аянбай еңбек етуде. Біздің студенттер заманауи ғылыми-зерттеу орталықтарында тәжірибеден өтіп, білімдерін шыңдайды.

Институттағы «Агробиология», «Ветеринария және малшаруашылығы», «Аквакультура» сынды ғылыми-зерттеу орталықтары ауылшаруашылығы, агрокешен және сушаруашылығы салалары бойынша заманауи зерттеулер жүргізеді. Бұл орталықтардағы тәжірибе алаңдары мен зерттеу зертханалары – жастар үшін үлкен мүмкіндік.

ІТ академиясы арқылы студенттер жаңа технологиялармен жұмыс істеп, заманауи ІТ құзыреттіліктерін дамыта алады. Бұл академия әлемдік деңгейдегі «HUAWEI» және «CISCO» желілік академияларымен серіктесе отырып, студенттерімізге жоғары деңгейдегі білім береді. Сонымен қатар «Шерхантану» ғылыми-зерттеу орталығы арқылы студенттер көрнекті тұлға Шерхан Мұртазаның мол мұрасымен танысып, оны зерттеуге мүмкіндік алады.

Жастарға қолдау көрсету мақсатында Шерхан Мұртаза атындағы Халықаралық Тараз инновациялық институтында арнайы «Ректор гранттары» тағайындалып, әртүрлі санаттағы студенттерге тегін білім алу мүмкіндігі ұсынылады. Сондай-ақ институтта «100 грант» жобасы жүзеге асырылып жатыр. Бұл жоба талантты жастарға қосымша гранттар арқылы білім алуға жол ашып, оқуға құштар студенттерге үлкен мүмкіндік береді.

Институтта әлеуметтік жағдайы төмен студенттерге қолдау көрсетуге ерекше көңіл бөлінген. Сонымен қатар білім, өнер және спорт салаларында жетістікке жетіп, жеңімпаз атанған жастарға оқу ақысын төлеуде жеңілдіктер қарастырылған.

Жастар үшін ең қолайлы жағдай жасауға тырысып, біз олардың тек білім ғана емес, спорт, өнер және шығармашылықпен айналысуына қолдау көрсетеміз. Мәселен, оқу орнымыздағы Студенттер үйі – жайлы жатақхана ғана емес, білім алып, бос уақытын тиімді өткізуге арналған толыққанды кешен. Мұнда шығармашылық орталықтар мен электрондық оқу залы, спорт секциялары, кинозал және асхана бар. Жастардың спортпен айналысуына жағдай жасап, олардың салауатты өмір салтын ұстануына баса назар аударамыз. Осы ортадан түлеп ұшқан Асланбек Шымбергенов, Дулат Бекбауов сынды танымал спортшыларымыздың жетістігі – осы еңбегіміздің жемісі. Кеше ғана оқу орнымыздың 2-курс студенті Асылхан Көшербай АҚШ-тың Колорадо штатындағы Денвер қаласында өткен жастар арасындағы бокстан әлем чемпионатының күміс жүлдегері болды.

Халықаралық студенттер күні қарсаңында барша студенттерге табыс пен жетістіктер тілеймін! Сіздердің білімге деген құштарлықтарыңыз бен ерік-жігерлеріңіз еліміздің болашағын жарқын етері сөзсіз. Жарқын болашаққа жол ашатын әрбір жастың өз арманына жетуіне тілектеспін! 

Махметғали САРЫБЕКОВ,

Шерхан Мұртаза

атындағы Халықаралық

Тараз инновациялық

институтының ректоры,

ҚР Еңбек сіңірген қайраткері