Ауданда білім саласы бойынша 2 мектептің құрылысына және 2 мектепке күрделі жөндеу жұмыстарын жүргізуге 1925,7 миллион теңге бөлініпті. Нақтырақ айтқанда, Ойтал ауылындағы №48 орта мектепке 200 орындық қосымша ғимарат салынып,  спортзал да бой көтеруде.  Сол сияқты Андас батыр ауылындағы мектепке 150 орындық қосымша ғимарат құрылысы жүргізілуде. Бұдан бөлек Ақтоған ауылындағы №4 және Мыңқазан ауылындағы №30 орта мектептердің  ғимараттары күрделі жөндеуден өтуде. – Тұрғындарды таза ауызсумен қамту бағытында да нақты нәтижелер бар. Бұл тұрғыда республикалық бюджеттен 5 жобаға   4 450,2 миллион теңге бөлінді.

Оның ішінде Ақтоған ауылындағы ауыз су жүйесінің құрылысына    1 111,1 миллион теңге қарастырылып отыр.  Сонымен қатар Ақарал, Кеңес, Сыпатай,  Гранитогорск ауылдарындағы  ауызсу құбырын жаңартуға қаржы бөлінді. Облыстық бюджеттен «Меркі» шипажайында су құбырларын ауыстыруға және резервуар салуға  62,7 миллион теңге бөлініп, мердігер анықталды, – дей келе, Жорабек Нұрмергенұлы аудандағы проблемалық мәселелерге де тоқталды. 

Ауызсу құбырларын жаңарту бойынша Меркі, Жамбыл ауылдары және Меркі бекеті бойынша үш жобаны республикалық бюджеттен қаржыландыруға өтінім берілген. Алайда аталған нысан бойынша бюджеттен қаржы бөлінбеуіне байланысты мердігер мекемелер, техникалық және авторлық қадағалаушылармен қосымша келісімдер жасау мүмкіндігі жоқ екен. Сол себептен құрылыс-монтаж жұмыстары жалғасын таппай отырған көрінеді. Жалпы Меркі ауданында өткен жылдың тиісті кезеңімен салыстырғанда бюджеттік инвестициялар 2,2 есеге, жеке және қарыз қаражаты есебінен салынған инвестициялар көлемі 17,1 пайызға өсіпті. 2024 жылдың қаңтар-мамыр айларында құрылыс жұмыстарының көлемі 5342,6 миллион теңгеге ұлғайыпты. 

А.Нақыпжанқызы, 
М.Х.Дулати атындағы 
Тараз өңірлік
 университетінің 
3-курс студенті