Бүгінгі өмірді ұялы телефонсыз елестету әсте мүмкін емес. Әсіресе, адамдармен хат-хабар алмасып, хал-жағдай сұрасуда осы бір байланыс құралының көмегі көп. Тіпті, смартфондағы сан түрлі функциялар арқылы «Электронды үкімет» порталының қызметтеріне жүгінуге де мүмкіндік туып тұр. Ол үшін SIM-картаға электронды цифрлы қолтаңба алған жөн. Бұл үшін не істеу керек? Әуелі ұялы байланыс операторларынан ЭЦҚ жазу мүмкіндігі бар SIM-картаны сатып аласыз. Мұнан соң ЭЦҚ генерациясына өтініш беру үшін "Азаматтарға арналған үкімет" коммерциялық емес акционерлік қоғамының филиалына өту қажет. Келесі кезекте нұсқауларды орындау арқылы телефоныңызда баптауды іске асырасыз. Пайдаланушының электронды цифрлы қолтаңбасы оның SIM-картасына байланысты болады. Басты артықшылығы – пайдалану және ұтқырлық. Сұранысты растау үшін пайдаланушыға кемінде мәтіндік хабарларды жіберуге қолайлы ең қарапайым телефон қажет болады. SIM-картадағы ЭЦҚ ұялы телефонның кез келген үлгілерінен электрондық қызметтер мен сервистерді алуға мүмкіндік береді. Нақтырақ айтқанда, мобильді ЭЦҚ көмегімен қызметтерді қалай алуға болады? Мысалы, SIM-картадағы электронды цифрлы қолтаңбасымен "Электрондық үкімет" порталының қызметтерін алуға болады. SIM-картадағы ЭЦҚ-ны пайдалана отырып, қызметті алу үшін төмендегі рәсімдерді орындау керек: 1. Сұранымға қол қою әдісі- "SIM-картадағы ЭЦҚ таңдау". 2. ЭЦҚ бар ұялы телефон нөмірін растау. 3. Ұялы телефонда "Қол қою" хабары көрсетіледі. Сол сәтте қол қою процесін растау. 4. Ұялы телефонда кілтіңіздің атауы көрсетіледі. Қол қою процесін жалғастыруды растау. 5. Ұялы телефонда "PIN кодын енгізіңіз" командасы көрсетіледі. ЭЦҚ PIN-кодын енгізу және қол қою процесінің жалғасуын растау. 6. Ұялы телефонда "Қолтаңба сәтті жасалды!" деген хабарламадан кейін қол қою процесін растау 7. "Нәтижені қарау" батырмасын басу. 8. Мобильді Жеке кабинетте ("Өтініштер тарихы" бөлімінде), сондай-ақ "Электронды үкімет" порталындағы жеке кабинетте өңделген анықтамамен танысу және талап етілген жерге көрсету. Міне, бүгінде шағын ғана SIM-картаның үлкен көмегі тиіп жатыр. Ең бастысы нұсқаулықтарды мұқият орындау қажет.

Алима ТУРТЕЕВА, Шу аудандық халыққа қызмет көрсету бөлімінің маманы