Ғылым және жоғары білім министрлігі қолға алған бұл жоба Мемлекет басшысының тапсырмасына сәйкес жүзеге асырылуда. Ауқымды бастама елдің технологиялық дамуына серпін беретін стратегиялық қадам ретінде бағаланып отыр.

Министрлік мәліметіне сүйенсек, жаңа университет бірден толық қалыптаспайды. Жоба кезең-кезеңімен жүзеге асырылады. Қазіргі таңда оның ұйымдастырушылық, академиялық, қаржылық және инфрақұрылымдық негіздері жан-жақты пысықталуда.

Халықаралық тәжірибе негіз болады

Жаңа оқу ордасын қалыптастыруда әлемдік жетекші университеттердің тәжірибесі ескерілмек. Атап айтқанда, Carnegie Mellon University, Mohamed bin Zayed University of Artificial Intelligence, Northeastern University, Hong Kong University of Science and Technology, China University of Political Science and Law және Seoul Cyber University сынды беделді оқу орындарымен әріптестік орнату мәселесі қарастырылып жатыр.

Бұл серіктестік Қазақстандағы AI-университеттің академиялық бағыты мен ғылыми зерттеу жүйесін қалыптастыруда маңызды рөл атқарады.

Оқу процесі 2026 жылы басталады

Министрлік жоспарына сәйкес, жобаның алғашқы кезеңі 2026 жылдың қыркүйегінде іске қосылады. Оқу үдерісі Астанадағы EXPO аумағында орналасқан “Нұр Әлем” павильонындағы Alem AI халықаралық жасанды интеллект орталығы базасында ұйымдастырылады.

Ал университеттің толыққанды академиялық бағдарламалары, соның ішінде бакалавриат деңгейі, 2028 жылдан бастап іске қосылады.

Жаңа буын мамандары даярланады

Жоба аясында дәстүрлі IT мамандарымен шектелмей, жасанды интеллектті әртүрлі салаларда қолдана алатын әмбебап кадрлар даярлау көзделіп отыр. Бұл бағыт “AI + X” моделіне негізделген. Яғни, жасанды интеллект мына салалармен ұштасады:
    •    құқық
    •    экономика
    •    логистика
    •    қаржы
    •    және өзге де салалар

Мұндай тәсіл еңбек нарығының сұранысына сай, кең бейінді мамандар даярлауға мүмкіндік береді.

Ғылым мен бизнестің байланысы күшейеді

Жаңа университет тек білім беру орталығы ғана емес, сонымен қатар қолданбалы ғылыми зерттеулердің алаңына айналмақ. Осы ретте индустриялық серіктестікке ерекше мән беріліп отыр.

Негізгі әріптестер қатарында “Самұрық-Қазына” қоры және оның еншілес компаниялары бар. Олар кадрлық сұранысты айқындап қана қоймай, ғылыми жобаларға тапсырыс беруші ретінде де қатысады.

Министрлік өкілдерінің айтуынша, университет қызметі Қазақстан Республикасының заңнамасы мен мемлекеттік білім стандарттарына толық сәйкес жүзеге асырылады. Бұл ретте білім гранттары, ғылыми қаржыландыру және мемлекеттік қолдау тетіктері сақталады.

Жалпы алғанда, AI-университеттің құрылуы Қазақстанда жасанды интеллект саласы бойынша жүйелі кадр даярлау экожүйесін қалыптастыруға бағытталған маңызды қадам болып отыр.