Жамбыл облысы бойынша Қылмыстық-атқару жүйесі департаментіне бағынысты №26 түзеу мекемесінің жеке құрам қызметкерлері таңертең сағ: 7:50-де сақадай сапға тұрып, саптық даярлық тексерістен соң басшылық тарапынан нақты тапсырмаларды алады. Осылайша, әр бөлім өзіне тиесілі міндетті мінсіз атқару мақсатында шұғыл қызмет орнына аттанады. Міне, таң атқаннан күн батқанға дейін мекеме қызметкерлері дәл осылай тынымсыз еңбек етеді. Ал кезекші топқа түсетін қызметкерлерге жүктелген жұмыстың салмағы ауыр. Таңертеңгілік саптық даярлықта нұсқаулық алған олар арнайы контингент арасындағы түрлі құқық бұзушылықтың алдын алып, тәулік бойы қауіпсіздікті күзетеді. Айта кетейік, қызметтік этикаға сәйкес ҚАЖ қызметкерлері түрлі тағдыр мен сан алуан мінезді "көтере білуі" тиіс. Қорыта айтқанда, түгесілгелі тұрған ашуын салқын сабырға жеңдіріп үйренуі қажет!