Осыған байланысты полиция қызметкерлері стадион аумағында және оған іргелес жерлерде қоғамдық қауіпсіздікті қамтамасыз ету мақсатында қосымша шаралар қабылдауда.

Алматы қаласы полиция департаментінің бастығы Айдын Кабдулдиновтың айтуынша, спорттық іс-шара кезінде қоғамдық тәртіп қатаң бақылауда болады.

– Матч өтетін күні стадион мен оған іргелес аумақта қауіпсіздік шаралары барынша күшейтіледі. Қоғамдық тәртіпті қамтамасыз етуге қосымша полиция күштері жұмылдырылады, – деді ПД бастығы.

Сондай-ақ ол жанкүйерлерді стадиондағы белгіленген ережелерді сақтауға шақырды.

– Футбол – эмоция, қолдау және өз командаңа деген адалдық. Дегенмен баршаға ортақ бір қағида бар: заң мен тәртіп кез келген эмоциядан жоғары тұрады. Агрессия, арандату, балағат сөздер, қорлау, бұзақылық әрекеттер, сондай-ақ тыйым салынған заттарды пайдалану – мүлде жол берілмейтін әрекеттер. Мұндай жағдайларда полиция тарапынан жедел шаралар қабылданады. Құқық бұзушылар анықталып, әрбір дерекке құқықтық баға беріледі, – деп атап өтті Айдын Кабдулдинов.

Полиция өкілдері қала тұрғындары мен жанкүйерлерді қоғамдық тәртіпті сақтап, матчты мәдениетті түрде тамашалауға шақырды.