Жабдықтарды жаңарту бағдарламасы аясында қан дайындау бөліміне орнатылған бұл жаңа аппарат қан компоненттерін дайындаудың барлық кезеңін толық автоматты бақылауға алып, экстракциялау процесінің жоғары дәлдігі мен тұрақты сапасын қамтамасыз етеді. Нәтижесінде медициналық ұйымдарға жеткізілетін қан өнімдерінің сапасы айтарлықтай артып, тұрғындардың өмірі мен денсаулығын сақтауға нақты үлес қосылады.

Аталған құрылғы  басты артықшылықтарының бірі – технологиялық процестердің толық стандартталуы, бұл адами факторды азайтып, дайын қан компоненттерінің қауіпсіздігін едәуір күшейтеді.
Сонымен қатар жабдық деректер алмасу және қашықтан мониторинг жүргізу мүмкіндігімен жабдықталған. Бұл жүйе жұмыс барысының сенімділігі мен үздіксіздігін арттырып, төтенше жағдайларда облыс тұрғындарын қанмен жедел қамтамасыз етуге жол ашады.

Жаңа буындағы жабдықты енгізу – Жамбыл облысындағы қан қызметін дамытудың стратегиялық маңызы бар қадамы және халықаралық стандарттарға толыққанды жақындаудың айқын дәлелі.