«Broadening Horizons: Building Global Bridges in Higher Education» тақырыбымен ұйымдастырылған форум аймақ университеттерінің жаһандық бәсекеге қабілеттілігін арттыру, халықаралық ынтымақтастықты тереңдету және академиялық мобильділікті кеңейту мәселелерін жан-жақты талқылауға бағытталды.

Ауқымды іс-шараның салтанатты ашылуына жоғары білім беру саласындағы талдау фирмасы құрастырған салыстырмалы университет рейтингтерін жариялап отыратын «Quacquarelli Symonds» компаниясының Президенті және директорлар кеңесінің төрағасы Нунцио Куакуарелли, «Central Asian University» негізін қалаушы Джахонгир Артикходжаев, сондай-ақ Ұлыбританияның Өзбекстандағы Елшісі Тимоти Смарт қатысты. Форумда спикерлер құттықтау сөз сөйлеп, білім саласындағы аймақаралық интеграцияның артуы мен жаңа геостратегиялық бастамалардың дамып келе жатқанын ерекше атап өтті. Сондай-ақ жаһандық білім беру нарығында Еуразия аймағының салмағы жыл сайын өсіп келе жатқанын, ал зерттеулер мен инновациялық жобалардың сапасы халықаралық рейтингтердегі көрсеткіштерден айқын көрінетінін айтты.

Өз сөзінде Нунцио Куакуарелли университеттер арасындағы ынтымақтастық шекара мен экономикалық айырмашылықтарға тәуелді емес, керісінше ортақ ғылыми мақсат пен сапалы білім беруге ұмтылысқа негізделетінін жеткізді. Оның пікірінше, әлемдік рейтингтер тек өлшеу құралы емес, университеттердің даму стратегиясына ықпал ететін маңызды индикаторға айналды.

Форумның маңызды бөлімдерінің бірі – «Ministerial Keynotes» секциясы жоғары білім саласын дамытудағы мемлекетаралық саясаттың көкжиегін айқындады. Бұл алаңда Өзбекстан Республикасы Жоғары білім, ғылым және инновациялар министрінің бірінші орынбасары Сардор Раджабов, ҚР Ғылым және жоғары білім министрі Саясат Нұрбек, Әзербайжан Республикасының ғылым және білім министрі Эмин Амруллаев сөз сөйлеп, трансшекаралық әріптестіктің стратегиялық маңызына тоқталды.

Форумға Қазақстаннан қатысқан жоғары оқу орындарының ішінде М.Х.Дулати атындағы Тараз университетінің өкілдері де болды. Университет атынан стратегиялық даму және интернационалдандыру жөніндегі проректор Шолпан Есімова қатысып, оқу орнының даму бағыттарын таныстырды. Ол панельдік сессиялар мен пікірталастарға белсенді араласып, университеттің халықаралық ашықтықты арттыру, академиялық мобильділікті кеңейту, көпжақты серіктестік жобаларын дамыту сияқты стратегиялық бастамалары туралы жан-жақты ақпарат берді. Проректордың пікірінше, мұндай форумдар университеттерге өз әлеуетін халықаралық аудитория алдында көрсетуге, жаңа серіктестермен келіссөздер жүргізуге және тәжірибе алмасуға мүмкіндік беретін бірегей алаң.

– «QS Eurasia Forum – 2025» – өңірлік әрі жаһандық деңгейде жоғары білім беру саласындағы өзекті трендтерді талқылауға мүмкіндік беретін маңызды платформа. Біз үшін бұл форум жаңа серіктестермен байланыс орнатуға ғана емес, университетіміздің халықаралық стратегиялық ұстанымын таныстыруға да жол ашты. Бүгінгі талқылаулар университеттер арасындағы өзара түсіністікті арттырып, академиялық мобильділік пен ғылыми ынтымақтастықты кеңейтудің жаңа мүмкіндіктерін көрсетті. Болашақта білім беру экожүйесінің дамуы халықаралық интеграция деңгейіне тікелей байланысты, сондықтан мұндай алаңдар біз үшін аса құнды, – дейді Ш.Есімова.

Форум шеңберінде өткен пікірталастарда жоғары білім саласын дамытудың жаңа үрдістері, жасанды интеллектіні білім беру үдерісіне енгізу, тұрақты даму стратегиялары және жаһандық серіктестік мәдениетін қалыптастыру мәселелері жан-жақты талқыланды. Сарапшылар университеттердің бәсекеге қабілеттілігі тек рейтингтермен өлшенбейтінін, сонымен бірге олардың қоғамға, экономикаға және өңірлік инновацияларға қосқан үлесімен бағаланатынын айтты.

«QS Eurasia Forum – 2025»-ке қатысу М.Х.Дулати атындағы Тараз университеті үшін халықаралық аренадағы беделін арттыруға, жаңа ынтымақтастық форматтарын іздеуге және білім беру саласындағы әлемдік тенденциялармен танысуға жол ашқан маңызды бастама болды. Форум барысында орнатылған байланыстар алдағы уақытта бірлескен ғылыми жобалар, студент және оқытушы алмасу бағдарламалары, сондай-ақ халықаралық серіктестік желілерін кеңейтуге мүмкіндік бермек.

Ақтоты ЖАҢАБАЙ