Жиырма жыл дегеніміз тарихи уақыт өлшемімен алып қарағанда аз да, көп те емес. Ғылым мен технология ғарыштық жылдамдықпен алға басқан ғасырда 20 жыл – түрленіп-түлеп, дамып-қалыптасып үлгеретін кезең. Әулиета өңірі жастарының шығармашылық шеберханасына айналған облыстық «AR-AI» жастар газеті бұл белесті дәл осылай еңсеріп отыр.
Аймақтағы талантты, талапты жастардың шоғырын жинап, ақпарат айдынына жаңа леп әкелуді мақсат тұтқан «AR-AI» газеті жиырма жылда осы үдеден шыға алды. Өз оқырмандарын тапты. Көптің көңілінен шықты.
Мемлекеттік қызметтің тізгінін ұстап, ел деп еңбек ете жүріп еш уақытта газет-журналдардан қол үзбедім. Ел газеті –«Egemen Qazaqstan»-нан бастап, облыстық барлық басылымды шолып өтіп, назар аудартқан мақала, сұхбаттарды, сараптамаларды оқып шығуды әдетке айналдырдым.
Жалпы, халық пен биліктің арасындағы тепе-теңдікті сақтау, бақылау және ескерту, еске салу, түптеп келгенде «Еститін мемлекет» тұжырымдамасын жүзеге асыру жағынан келгенде, БАҚ пен мәслихаттың көтеретін жауапкершілік жүгі бірдей. Екеуі де – халықтың өкілі. Бұқараның аманатын арқалаушы.
Халықтың рухани сұранысын өтеп қана қоймай, әлеуметтің әлеуметтік мәселелерін зерделеп, тілегін жеткізіп жүрген «AR-AI» газетінің ұжымын 20 жылдық белесімен шын жүректен құттықтаймын!
Ақпарат айдынында көтерген желкендеріңіз жығылмай, әлі талай жиырма жылдарды еңсере беріңіздер!
Абдалы НҰРАЛИЕВ,
облыстық мәслихаттың төрағасы
Алдыңғы мақала
Келесі мақала
Қай кезде де құрметпен қараймыз
Ұқсас жаңалықтар
