Қазақстан Республикасының Мәдениет және ақпарат министрі Аида Балаева Google компаниясының Израиль, Түркия, Орталық Азия мен Кавказдағы мемлекеттік саясат және мемлекеттік органдармен байланыс жөніндегі өңірлік директоры Ноа Лоффлермен кездесті.

Кездесуде тараптар өзара ынтымақтастықтың басым бағыттарын талқылады. Министрліктің басты назарында – адами құндылықтарды дәріптеу, халықтың цифрлық және құқықтық сауатын арттыру, сондай-ақ балалардың онлайн ортадағы қауіпсіздігін қамтамасыз етуге бағытталған жобалар бар екені атап өтілді.

Сондай-ақ Google компаниясының Қазақстандағы ресми өкілін бекіту мәселесі жеке қаралды.

– Google-пен ынтымақтастық Қазақстандағы цифрлық мәдениет пен қауіпсіздіктің дамуына ғана емес, технология саласындағы халықаралық диалогты нығайтуға да ықпал етеді деп санаймыз. Қазақстан ашық әрі жүйелі байланысқа дайын, – деді министр Аида Балаева.

Кездесу барысында контентті модерациялау мәселесі де көтерілді. Министр қолданыстағы тетіктердің жеткілікті тиімді еместігін айтып, Google командасының Астанаға сапары аясында заңсыз контентті жоюға қатысты воркшоп ұйымдастырылатынын хабарлады.

Сонымен бірге Қазақстанда Google компаниясының ресми кеңсесін ашу перспективалары талқыланды. Ел қарқынды дамып келе жатқан өңірлік көшбасшы, қолайлы инвестициялық ортаға ие мемлекет ретінде ұсынылды.