Облыста жұмыссыздық деңгейін төмендету, халықтың табысын арттыру және кадрлар сапасын жетілдіру бағытында бірқатар жұмыстар атқарылып, жүйелі жоспарлар бекітілуде. Биыл өңір бойынша Электронды еңбек биржасы арқылы 192 жоба шеңберінде 2 732 жаңа жұмыс орнын құру көзделген. Бүгінгі күнге дейін оның 98 жобасы енгізіліп, 442 азамат тұрақты жұмысқа орналасқан.

Облыс әкімдігі жұмыспен қамтуды үйлестіру және әлеуметтік бағдарламалар басқармасының басшысы Еркін Келесовтың мәліметінше, осы жылы жұмыспен қамтудың белсенді шараларына 54 514 адамды тарту жоспарланған. Ал жыл басынан бері бұл көрсеткіштің 47 пайызы орындалып, 25 603 адам белсенді шараларға қатысқан.

– Еңбек нарығын дамытудың 2024–2029 жылдарға арналған тұжырымдамасы аясында 2025 жылға 45 113 адамды жұмысқа орналастыру жоспары бекітілген. Қазіргі уақытта жұмыс берушілердің бос жұмыс орындары мен субсидияланатын жұмыс орындарына орналастыру арқылы 19 444 азамат еңбекке тартылып, жоспардың 43,1 пайызы орындалды. Оның ішінде тұрақты жұмыс орындарына 8 330 адам, ал субсидияланатын жұмыс орындарына 11 114 адам орналастырылып, бұл бағыттағы жоспар 80,1 пайызға орындалды.

Осы жылдың «Жұмысшы мамандықтар жылы» болып жариялануына орай, министрлік тарапынан «Ұрпақтар келісімшарты» және «Алғашқы жұмыс орны» жобалары мамыр айынан бастап іске қосылып, маусым айынан өтінім қабылдау басталды. Осы себепті көрсеткіштер уақытша төмен қалыптасқанымен, барлық жоспарланған жұмыс орындары жыл қорытындысымен толық орындалатын болады.

Сонымен қатар кәсіпкерлікті дамытуға айрықша назар аударылуда. Атап айтқанда 1 008 азаматқа 400 айлық есептік көрсеткіш мөлшерінде жалпы 1 572,8 миллион теңге көлемінде қайтарымсыз грант беру жоспарланған. Есепті кезеңде 501 адамға грант бөлу туралы комиссияның оң шешімі қабылданды. Бұдан бөлек, кәсіпкерлік бастамаларды қолдау мақсатында 362 жасқа 2,5 пайыздық мөлшерлемемен микрокредит беру көзделген еді. Алайда республикалық деңгейде қаражат бөлінбеуіне байланысты бұл меженің орындалмау қаупі бар, – дейді Еркін Келесов.

Бұдан бөлек, жұмыссыз азаматтардың біліктілігін арттыру және жаңа мамандықтар бойынша оқыту шаралары жүйелі түрде жүргізілуде. Биыл облыс бойынша білім беру ұйымдары мен жұмыс берушілер базасында қысқа мерзімді кәсіптік оқыту бағдарламасына 412,7 миллион теңге бөлініп, осы қаражат есебінен 1 315 азаматты оқыту жоспарланған. Қазіргі таңда 579 адам кәсіби даярлықтан өтуге жолданған. Сонымен қатар атаулы әлеуметтік көмек алушылар саны да біртіндеп азайып, еңбек нарығына белсенді араласып келеді. Басқарма басшысының дерегінше, 2025 жылдың 1 шілдесіне дейін атаулы әлеуметтік көмек 3 408 отбасыдағы 18 705 адамға тағайындалып, жалпы сомасы 1 156,4 миллион теңге төленген. Алты айдың қорытындысы бойынша атаулы әлеуметтік көмек алушылар саны өткен жылдың сәйкес кезеңімен салыстырғанда 8 933 адамға кеміген.

 – Атаулы әлеуметтік көмек алушы отбасыларға жасалған ішінара зерделеу жұмыстарының нәтижесінде 109 отбасыға 11,1 миллион теңге атаулы әлеуметтік көмекті заңсыз тағайындау фактілері анықталған. Атап айтқанда 7 өтініш атаулы әлеуметтік көмекке мұқтаждықты айқындау өлшемшарттарына сәйкес емес, 23 өтініште табыстары толық есептелмеген немесе артығымен есептелген, 10 өтініште алимент өндіріп алу туралы құжаттары жоқ, 21 өтініште табысын растайтын құжаттары толық емес немесе салынбаған, 12 өтініште еңбекке қабілетті мүшесі жұмыспен қамтудың белсенді шараларына тартылмай тағайындалған, 4 өтініште әлеуметтік келісімшарт талаптары бұзылған, 32 өтініште қосымша еңбек шарттары тіркелген немесе еңбек шарттары тіркелмеген.

Мұнымен қоса 2024 жылдың 2-ші жартыжылдығында атаулы әлеуметтік көмек тағайындалған өтініштерге ішінара зерделеу нәтижесінде Тараз қаласында 26 өтініш, Жамбыл ауданыда 3 өтініш, Шу ауданыда 8 өтініш бойынша заң талаптары сақталмағандығы анықталып, 7,1 миллион теңге заңсыз төленгендігі нақтыланып, ресми хаттармен әкімдіктерге жолданған. Дегенмен, биылғы жылы аталған әкімдіктерде кемшіліктер қайта қайталануда,– дейді Е.Келесов.

Осылайша өңірімізде жұмыспен қамту шаралары қарқын алып, заңсыз әрекеттердің де жолы кесілуде. Бұл өз кезегінде халықтың еңбек әлеуетін арттырып, жаңа жұмыс орындарына көбірек азаматтардың тартылуына ықпал етуде.

Мұқағали БАЛТАБАЕВ