Қазақстан Республикасының Конституциясы – мемлекеттілігіміздің негізі ғана емес, әділ сот төрелігінің де басты кепілі болып табылады. Конституцияда әр азаматтың құқықтары мен бостандықтары нақты көрсетіліп, оларды қорғау міндеті сот жүйесіне жүктелген. Сот билігі – қоғамдағы әділеттілікті қамтамасыз ететін басты тармақ. Конституция осы биліктің тәуелсіздігін, ашықтығын және заң үстемдігін нығайтып отыр.
Бүгінгі күні сот жүйесі Конституцияда бекітілген нормаларға сүйене отырып, азаматтардың құқықтары мен заңды мүдделерін қорғауда. Судьялардың кәсіби тәуелсіздігі, әділ шешім шығаруына жасалған жағдайлар – барлығы Конституциядан бастау алады. Сот әділдігі болмаса, қоғамда сенім де, тұрақтылық та болмайды. Сондықтан әділ сот төрелігі – демократиялық мемлекет дамуының басты көрсеткіші.
Қазақстанда сот жүйесі үнемі жетілдіріліп, заман талабына сай реформалар жүргізілуде. Бұл реформалардың түпкі мақсаты – Конституция бекіткен әділдік қағидатын толық жүзеге асыру. Соттар азаматтардың құқықтарын қорғап қана қоймай, заң алдындағы теңдік қағидасын орнықтырып, халықтың сот билігіне деген сенімін арттырып келеді.
Конституция – әділ сот төрелігінің мызғымас негізі. Оны құрметтеу, оның талаптарын орындау – сот жүйесінің, әр судьяның және әрбір азаматтың ортақ парызы. Әділ сот – халықтың қорғаны, мемлекеттің тұрақтылығы мен дамуының кепілі.
Салтанат Койтекеева,
Жамбыл облысының мамандандырылған
ауданаралық экономикалық сотының судьясы
Ұқсас жаңалықтар
