Жайық-Каспий бассейндік инспекциясының Ақтөбе бөлімшесі су қорын қорғау және пайдалану талаптарының сақталуына байланысты облыстың бес коммуналдық мемлекеттік кәсіпорнында тексеріс жүргізді.

Тексеру нәтижесінде Қобда мен Қарғалы аудандарында, сондай-ақ Ақтөбе қаласындағы Ақжар-1, Қызылжар, Қарғалы, Жоғарғы Қарғалы, Өрлеу және Сазды тұрғын аудандарында жерасты суларын рұқсатсыз пайдаланған жағдайлар анықталды. Екі кәсіпорында мүлде су бұруға рұқсат болмаған.

– «Әкімшілік құқық бұзушылық туралы кодекстің 462-бабы 3-тармағына сәйкес, бес коммуналдық кәсіпорынға айыппұл салынды. Жалпы сомасы – 3,7 млн теңге», – деді Жайық-Каспий бассейндік инспекциясының басшысы Ерғали Үмбетбаев.

Айта кетейік, бұған дейін Қызылорда облысында алты шаруа қожалығы 2,3 млн текше метрден астам суды заңсыз пайдаланғаны анықталған болатын. Сондай-ақ, Арал-Сырдария бассейндік инспекциясы Шардара аудандық прокуратурасымен бірлесіп, Түркістан облысында 24 тіркелмеген сорғы қондырғысын тапты.

Бұл жағдайлар су ресурстарын заңсыз пайдалану проблемасының әлі де өзекті екенін көрсетеді.