Әскери бөлім аумағында ұйымдастырылған тазалық және көгалдандыру жұмыстарына қатысушылар айналаны қоқыстан тазартып, қураған бұта-шөптерді жинап, ағаш көшеттерін отырғызды.

5513 әскери бөлімінің бастамасы табиғатты аялауға бағытталған іс-шаралардың қатарын толықтырып қана қоймай, жас ұрпаққа үлгі боларлық тәрбиелік мәні зор қадам болды. Әскери қызметшілердің елге, табиғатқа деген жанашырлықпен жасаған әр ісі – патриоттық рухтың көрінісі.

Бөлім командирінің тәрбие және әлеуметтік-құқықтық жұмыстар жөніндегі орынбасары, подполковник Бауыржан Қансейітов іс-шараның маңыздылығына тоқталып, акция аясында тиісті жұмыстар алдағы уақытта да жалғаса беретінін жеткізді.

– «Таза Қазақстан» акциясы – азаматтық жауапкершілікті арттырып, табиғатқа жанашырлықпен қарауға үндейтін маңызды бастама. Біздің әскери бөлім қоғамның игілігіне бағытталған осындай іс-шараларға әрдайым белсенді түрде қатысып келеді. Бұл жолы да жеке құрам мен олардың отбасылары ауызбіршілік танытып, табиғатты қорғау жолында аянбай еңбек етті. Әсіресе балалардың қатысуы біз үшін маңызды. Себебі олар осындай іс-шаралар арқылы табиғатты сүюді, еңбектің қадірін, бірліктің мәнін бойларына сіңіреді, – деді Б.Қансейітов.

Ақтоты ЖАҢАБАЙ